Children Gymnastic

小如一年班入選學校體操隊, 一眨眼學左差不多三年啦! 最近教練叫佢去 YMCA 再操練多D, 希望可以訓練佢參加比賽。一直都有D豫疑不決, 因為係星期六嘅 8 點上堂....但小如問左好多次話好想好想學, 咁點都要比佢試吓嘅!

其實佢一直响學校上堂, 又冇得參觀, 都唔知佢學左D乜 (淨係成日見佢打側手番)。直到今日我响現塲睇左個半鐘, 真係覺得原來係好難嘅一種運動 ~~ 係咁跑、跳、前滾、後滾、一字馬等等, 真係小D體力同恆心都唔得! 不過佢好適合學體操, 雖然D動作仲有進步嘅空間, 但正如教練所講, 小如柔靭性好, 動作夠力, 比D心機一定會學得好。

有興趣比小朋友試吓, 可以睇 兒童體操 。

音樂細胞

如果樂樂嘅百厭係遺傳自爸爸, 咁佢唱歌跳舞嘅天份....應該冇乜!

冇天份唔緊要, 比D心機栽培吓囉! 呢排試吓吹口琴, 一教即曉!

高空生日派對

應朋友仔嘅邀請, 參加左一個响60樓舉行嘅生日派對! 除左派對地點响咁高之外, 仲有特別之處係呢個生日會係三個小朋友一齊慶祝佢哋嘅兩歲, 三歲同四歲, 好熱鬧。

老老實實, 咁高望落去真係有D驚! 但咁靚景....



胃口都好D啦 ~~ 薯片、蝦條、珍寶珠, 越食越好味!



加上地方又大, 又食又跑, 樂樂就最開心不過。

生命的樂趣...

生命的樂趣...在於過程!

今日下午睇左 霎時感動 嘅重播 ~~ 呢集講 捉蝴蝶! 係咪真係捉蝴蝶呢? 睇完先講。

" 富商留低一張字條比佢嘅四個仔, 上面寫著: 其實我並唔係真係想要蝴蝶, 我最想要嘅, 係你哋係捉蝴蝶嘅過程當中, 揾到樂趣。"

呢個香港呢個年代, 人人都在勞勞碌碌, 為嘅都係希望能夠比家人一個美好嘅生活環境。電視話養大一個小朋友要四百萬, 當每個父母都好努力咁揾第一個嘅四百萬、第二個嘅四百萬嘅同時, 其間忽略 (應該話係犧牲至啱) 嘅樂趣有幾多呢?

不經不覺, 做左全職媽咪兩年, 能夠陪住小如樂樂成長, 樂趣當然無窮啦 :) 但係就要辛苦爸爸再努力D咁追求成果啦!

牛王頭

係咪男仔特別牛王頭? 答案唔係! 不知見過幾多朋友嘅囝囝好斯文。

睇吓樂樂呢個樣 ~~ 惡晒! 想同你打過咁....有冇人想較量吓 >-<

五月 ~~ 真係好忙!

呢個樂樂生日月, 真係好多節目! 基本上個個星期都有 BB 朋友仔生日會, 加上樂樂嘅生日, 母親節等等, very busy 呢!

尋晚同班 BK 媽咪出去威 (唱K), 我哋呢班媽咪 (廿個) 都好癲吓, 又唱又跳, 嘈爆呀! 今日仲去咗探一個初生 BB, 又係成班柴嘩嘩。聽日又去生日會啦, 好似話又有廿個 BB, 真係利害, 呢排响 facebook 睇相睇到眼花 ~~

為食的豬

以為豬年出世嘅樂樂, 最多係爛訓遮, 估唔到佢仲超為食!

每晚食完飯, 食完生菓, 我哋都會食甜品 ~~ 今晚樂樂先黎痴媽咪枝紅荳雪條, 再擒去爸爸度搶枝脆皮, 再見到家姐杯 Rocky Road 雪糕, 即刻扮晒 friend, 真係服咗佢!

飲奶奶

成日聽親朋戚友講, 好担心小朋友唔食野呀, 食得慢呀, 揀飲擇食等等。

好好彩, 小如同樂樂由細到大都冇呢D問題 :) 可能係我哋乜都比佢哋試, 仲意嘅食多D, 唔仲意嘅咪唔食囉。小如細個見到咩美食, 都嘩嘩聲!

每次開奶比樂樂飲, 走入廚房擺低個樽蓋, 出黎佢差唔多飲晒啦! 爸爸今次陪佢計吓究竟飲一枝奶要幾耐....

答案係2分鐘! 比起媽咪細個食枝奶要一粒鐘, 又要睇金魚又要行街街, 樂樂真係好叻仔啊!

New look of my blog

唔經唔覺, 寫咗呢個 blog 一年啦!

係時候搞搞新意思 ~~ 新顏色配搭, 好唔好睇?

Preschooler

踏入兩歲, 人稱 "terrible twos"....可想而知有幾煩!

由 toddler 變做 preschooler, 中間嘅轉變有好多, 主要都係會獨立D, 因為開始有佢嘅主見; 語言嘅發展亦會好快, 加上認知能力越來越強, 大家要煩嘅嘢 ~~ 陸續有黎!

睇吓呢 D 資料, Preschooler and Articles for 2-year-old, 多以準備, 迎接每日嘅新挑戰 :)

生日快樂!

樂樂兩歲嘅慶祝活動, 又係去迪士尼呀! 雖然去過二三十次, 今日有 DD 特別 ~~ 係同兩個朋友仔一齊去, 一個係同樂樂同年同月同日生嘅小瑜, 仲有大樂樂一日嘅嵐嵐!

黎到迪士尼, 拿拿聲攞返個生日章先!




撞啱樂隊演奏, 仲醒隻生日歌樂樂嘆吓, 好感動啊!



今次夠高坐司機位啦 ~~



樂樂全程都有遮住, 媽咪就慘囉....曬到變左黑炭!

今年嘅 birthday cake, 仲係 haagen dazs, 超正呀!

Birthday gift

每次落樓下平台玩, 見到其它小朋友嘅單車, 樂樂都衝埋去想玩 ~~ 今年嘅生日禮物, 唔洗唸啦, 單車一架!

自己上車.....冇問題呀!

但係, 當然唔識踩啦, 推住佢行, 不知幾好玩, 行行吓仲示意叫我行開添!

愛是不保留

已經唔係第一次聽呢首歌, 但尋晚睇四川大地震一周年特輯嘅時候聽, 就更加感動! 我冇信主, 但每次見到一家大細 "hehe 哈哈", 都覺得我哋一家好幸福!

舊年樂樂生日, 開始寫呢個 Blog, 咁快就一年。可以同親戚朋友分享生活點滴, 其實好開心! 父母嘅愛、親人嘅愛、朋友嘅愛令到我哋生活得更充實, 更快樂。

上網揾到呢隻, 關心研唱真係好好聽!

Wow! That's what I call...

勁舞 Dancing Prince ~~ 對脚好似摩打, 跟埋拍子添架!

睇咩碟, 跳到咁勁?

一隻英國 Pre-school Learning Alliance 出嘅 Little Learners 系列 Wow! That's what I call Nursery Rhymes , 上次去兩歲豬仔團抽獎贏架, 估唔到樂樂咁仲意! 之前都唔覺佢咁有節奏感, 可能以前多數睇唱歌為主嘅碟啦。

仲有, 聽聞呢隻碟係朋友仔嘅老師介紹, 老師話另類音樂可以有 "另類啟發", 果然啟發咗樂樂嘅跳舞潛質! 依家每次開呢隻碟, 樂樂一見到出 "Wow" 字, 即刻大叫 "嘩"!

母親節快樂!

今年母親節, 好忙 ~~

中午同一眾長輩飲茶, 兩圍枱、六個媽咪一齊慶祝, 好熱鬧!

晚上輪到幫樂樂預祝生日啦! 由於姑媽同樂樂嘅生日相差一星期, 所以自舊年開始就一齊慶祝。今年嘅慶祝活動, 都係一家人食餐飯, 切吓蛋糕咁啦....

Brushing teeth!

由大約一歲開始, 就有幫樂樂臨訓前刷牙。初初得8隻牙, 又唔係食太多雜食, 目的主要都係想佢口腔乾淨D。越黎越大個, 咩都仲意食, 每日食嘅野, 十隻手指都數唔晒 :>

近來要佢早晚都刷牙啦! 呢排佢仲意扮大個仔, 要自己刷!



仲自己揸杯、自己漱口、自己倒水, 一脚踢添!

汀九新樓盤

屋企隔離嘅呢個樓盤, 我哋睇住佢起, 唔洗半年, 起好啦! 望上去好靚 ~~ 全複式單位(好似話起碼 3000 呎!!), 應該係一梯兩伙，原來叫 The Westminster Terrace , 仲話被市場視為淺水灣Grosvenor Place的荃灣版。唔知到開售時咩叫價啦.....

Let's play again!

呢排天氣真係好好, 日日陽光普照, 藍天白雲, 人嘅心情都靚 D !

又去玩啦 Yeah!



玩嘅野, 離不開擒高擒底.....



仲唔要人拖自己落樓梯! 不過樂樂份人好穩陣 (似足爸爸), 冇信心嘅野, 一定扶實架!

唔返學, 有咩玩?

H1N1 嘅疫情雖然唔算嚴重, 但係都唸住唔比樂樂返 playgroup 住, 始終佢仲係未有保護自己嘅能力。

唔返學, 有咩玩? 為有媽咪陪佢睇吓書, 跑吓, 學吓新事物啦!

暑期活動又黎啦!

每年暑假, 都會為小如安排一連串嘅活動, 務求令佢可以過一個充實嘅假期! 由幼稚園開始, 咩都試過啦: 語言、手工、廚藝、運動、音樂、跳舞、參觀 ..... 等等

隨着慢慢大個, 學嘅嘢都開始唔同! 活動唔再係媽咪揀, 係佢自己要參與。舊年跟學校去咗一個星期音樂農莊 (學吓自立同嚐吓辛苦) 同埋兩個星期英基嘅英文班, 加上另一D 學緊嘅課程, 真係都幾忙架!

今日啱啱幫佢報咗 YMCA 嘅一D暑期活動。每年 YMCA 都要預先交抽籌表, 再响安排嘅時去會所報名。今年有D運, 抽到上午時段, 結果想報嘅活動全部都報到! 包括親子煙花攝影遊、潛水班、BBQ 高爾夫同埋兩個星期嘅日營系列。除左呢D玩嘅活動, 當然要加多個記憶力訓練班添啦!

除左 YMCA, 我知 YWCA 都有類似嘅暑期活動。仲有朋友介紹嘅 International Christian School (ICS) 同 College of International Education (by HKBU), 大家可以參考吓。

如果想比小朋友學語言課程, 可以睇吓 ESF 或者 British Council 架!

兩歲豬仔團

我哋班 07 年5月BB話咁快又兩歲!

唸起舊年响酒店開 party, 有爬行大賽, 競步大賽, 85 個 BB 加埋屋企人, 多人多到連大合照都影唔到!

今年嘅新搞作, 係放 D BB 通山走, 親親大自然 ~~ 嘉道理農場、流浮山 + 牛牛樂園一日遮遊! 睇吓呢張大合照, 50 幾個 BB 夾埋有180 人.....兩個字形容晒 : 墟陷!



黎到嘉道理農場, 風景幾靚呀!



有咩玩? 睇吓動物, 睇吓禽鳥, 睇吓温室小花, 仲有不同品種嘅鮮人掌。



午飯之後去睇牛牛, 原來一隻牛成千幾磅喎!



可以試吓餵牛牛添, 連細佬都敢餵呀

今次旅行好開心, 天氣好, 又冇落雨, 好多謝一班義工搞手媽咪, 又整紅雞蛋, 又買蛋糕, 仲有幸運大抽獎添!

又去生日會啦

五月一日, 參加咗樂樂生日月嘅第一個爬地 ~~ 大 Woody 生日會!

Woody 媽咪安排咗小丑姐姐助慶, 玩吓遊戲同扭波, 不得不讚, 呢個姐姐扭D波好鬼靚, 仲好鬼似架! 好似門口呢個 Goofy 同 Pluto, 真係好得!




仲有呢頂蛋糕帽, 小如愛不惜手!