親子聖誕咭設計

今時今日, 返學己經唔係小朋友一個人嘅事....每星期嘅功課, 咪都係亞媽嘅功課囉! 每逢喜慶節目, 做手功嘅 >> 咪又係亞媽!

陪小如做咗咁多年功課加親子勞作, 今年輪到陪樂樂做啦。聖誕就快到, 梗要整張聖誕咭參加學校舉辨嘅設計比賽啦! 我哋今次呢個設計, 都好有心思架, d 雪花係樂樂貼架, 裡面都係佢整嘅, 希望可以攞返個安慰獎啦 ~~

冇工人的日子....

最後一日啦, Yeah! 工人姐姐嘅三星期大假終於完啦, 今晚返咗黎呀!

呢三個禮拜好似好漫長, 但都好彩 ~~ 有如爸放咗兩個禮拜幫吓手。其實D工人姐姐都幾能幹吓, 一個家真係好多嘢做架! 每日我哋兩公婆分担家務都好鬼攰, 試唸平時工人姐姐一脚踢幾好嘢。今次工人姐姐放假, 小如都好乖好幫手 (查實佢執好自己D嘢己經幫到啦), 又學拖地, 涼衫, 仲有煮餸添喎!

另類生日派對

成日參加生日會嘅地點, 不外乎老麥、炸雞店同薄餅屋等等。小如今日去咗一個好特別嘅派對 --> YMCA Indoor Climbing Wall !

佢話好好玩呀! 初初爬幾級試吓玩, 之後仲越爬越高添, 好刺激咁話 ~~

冬遊迪迪尼

自從搬咗屋, 都好耐冇探米奇米尼啦! 趁小如考完試, 又有 雪亮聖誕, 去玩吓啦!

小小世界門口多咗幾個場景比大家影相留念, 兩姊弟都影得好開心呀!

小小世界都好有聖誕氣氛, 連史迪仔都有戴聖誕帽!

樂樂呢排好仲意學家姐 ~~ 睇吓, 又幾似!

Sanrio Village

今日去咗青衣城, 參觀呢個叫做 << Sanrio Village 50個聖誕傳奇>> 嘅展覽。可能係平日, 唔算多人, 雖然場地比想像中細, 但D公仔又真係幾靚架！









睇完D公仔, 一家四口就响青衣城食飯。原來仲有個八達通 密密食 密密日日賞 嘅推廣, 用消費張單, 仲贏咗十幾蚊易賞錢呀!

亞樂整餅

朋友介紹, 帶咗樂樂去 " At home Pastry " 學整餅 ~~ Look! 全副武裝, 好鬼可愛啊!



唔係玩架, 真係整! 今次學整朱古力cupcake + 士多啤梨朱古力裝飾, 樂樂仲識晒全部材料, 包括 butter, sugar, chocolate, egg, milk...



焗完出黎啦....未整下半部己經食咗两個!!





嘩! 製成品都似模似樣架!



咦, 仲有D朱古力醬剩喎 >> 梗係唔好浪費啦 :)

芭蕾之星....

大家一定好奇怪點解我比樂樂學芭蕾舞而唔係學體操~~咪因為佢唔夠3歲囉, 哈哈!

但出奇地, 學咗個幾月, 佢都有板有眼喎。雖則唔係老師講嘅所有嘢佢都跟到, 但樂樂勝在記性好同模仿力強, 學得幾好架! 今日仲唔洗我陪咗半堂添喎 ~~



拉筋都好似樣吓!

老師仲同佢哋排舞, 話聖誕去表演喎 >> 吓唔係化...我有D驚佢搶晒鏡噃, 事關佢跟唔到拍子之餘仲可能會衝落台同觀衆握手!

樂樂的傑作

自從返咗N1, 樂樂變得好 "好學"!

成日仲意睇書, 好多書都係睇完又睇, 所以D生字全部識晒; 每次睇就扮晒醒咁自己讀, 好有滿足感!

每星期佢學校都有4版功課做 (填吓顏色、認吓字、畫吓連線、做吓小手功等等), 所需時間唔洗10分鐘。但每次做完功課, 佢都覺得唔夠喉...見到家姐做功課, 佢又坐低嗌 "homework", 邊有貢多功課你做呀仔 >> 為咗唔好浪費佢好學不倦嘅精神, 我為有買D課外練習佢做吓, 再加一D現實生活嘅認知 ~~ 今日玩貼花瓣!





好認真呀, 不停咁話 flower (我比咗D真花瓣佢玩), 睇吓佢張傑作:

my mobile phone....

今日放學, 攞住呢個勞作 >>> ???



幾經樂樂示範, 呵! 原來係手提電話 :) 即時仲扮聽添!

仲係最新款可以摺埋架, 得晒呀!

親子校園野餐樂

為咗配合教學主題「秋天」, 前兩日樂樂學校搞咗呢個活動。目的係透過感受天氣的轉變同體會親子野餐嘅樂趣。適逢天氣下降, 雖然已經全副武裝 (又冷帽又頸巾又大褸), 但經果今日要睇醫生~~ 冷傷風啦!

但係當日嘅活動就真係幾好 >> 一個鐘頭內又唱歌跳舞, 又有集體遊戲, 又有自由活動, 仲一齊扮野餐添! 加上爸爸又放假, 家姐放學又一齊黎, 名符其實親子樂!

先玩大降落傘熱吓身先, 樂樂勁開心 ~~

當日嘅衣着--> 好似雪人!

當然仲有玩佢至仲意嘅擒高擒低活動啦!

換季啦

呢幾日涼咗好多, 換季啦! 着返套長袖睡衣先。

今日仲執咗樂樂D冬天衫出來, 查實小朋友D衫真係着一季喳...舊年嘅冬天衫勉强啱着, 但褲就變晒四個骨! 好彩平時買買埋有好多存貨, 凍凍都冇有怕 :)

自製 tunnel slide

有時真係不得不讚小如同樂樂有幾 creative! 小如細個果陣見到D咩特嘢, 好快可以自己整一個類似嘅出黎, 例如用紙巾盒、橡筋、鉛筆+膠紙可以整個小提琴出黎; 又或者同A4紙、橡筋+釘書機可以整條雙折棍等等, 創意無限!

今回輪到樂樂將隧道同滑梯來一個二合一! 咁都得?

一人一花

樂樂嘅學校為響應康文署綠化校園計劃, 搞咗個「一人一花」活動, 目的係希望小朋友可以参與種植嘅過程。由依家開始種一盆<<石竹>>, 到出年三月先交。我第一樣唸到嘅嘢係...洗唔洗買定幾盆以防萬一!

見到個盆栽, 好明顯樂樂仲未明白點種同做咩要種, 因為佢想成盆倒出黎呀!!