明愛賣旗

同小如一齊去做義工, 幫明愛賣旗。

今次唔係我哋第一次賣旗, 但相當有難度.....雨係咁落, 梗係揾個有瓦遮頭嘅地步 - 荃灣地鐵天橋! 只不過係八點幾, 天橋上已經企咗幾個義工婆婆, 好艱辛先揾到個有利位置 (地鐵站出口)。

但係出地鐵嘅人買咗 (應該係第二D站買), 入地鐵嘅人都買咗 (可能係前面已有義工), 搞到小如好冇心機!

結果雨越落越大, 又担心爸爸一個人搞唔掂樂樂, 支持咗兩個鐘, 我哋决定交旗袋。雖然唔係有好多善款, 但都總算出一分力!

傾盆大雨

小如放假, 一早同埋樂樂返英文 playgroup 。估唔到佢依家仲意玩打掃, 搬櫈就梗係强項啦!

返到屋企樓下, 大雨到....車都落唔到! 結果為有去咗佢哋最仲意嘅沙田 JC play room 玩。樂樂仲識鍊車同爬樓梯, 睇吓:

小如去迪士尼参加生日會

小如同學今日下午開生日會。同學嘅媽咪照顧好週到~~安排咗旅遊巴由學校車佢哋去酒店。小如梗係想趁高興搭旅遊巴啦, 點都叫我唔洗接佢去; 難得佢唔驚, 由得佢試吓啦! 下午同樂樂去酒店接小如, 去到樂樂梗係好開心啦, 周圍走, 好似 housekeeping 巡房咁!


行吓行仲訓係地下猛咁笑!

冇工人的日子

前日突然收到工人個亞媽過身嘅消息, 兩日來忙於安排佢返印尼。

呢兩個星期點算? 今曰只不過係第一日....車住樂樂去小如學校攞旗袋同接放學！ 九龍塘接放學, 真係奇景。條街泊滿車 (當然唔係車位), 見到人人都泊, 就算係咁比人呠, 我都要試一試。

入到學校, 好似行花市咁多人! 抱住樂樂又要迫去攞旗袋, 好彩都好快揾到小如。急急脚走去攞車, 哈哈又無抄牌喎！

冇工人, 又要做家務又要煮飯, 樂樂要自已玩啦!

端午節~~做節

李氏家族晚飯做節, 一定係去凱旋啦!

今日比較特別.....全家又着親子裝! 呢套係來佬貨, 德國嘅交通燈黎架! 仲有表哥姑姐都有。六個一齊着, 會唔會誤以為我哋傻架?
















成日都想同三老表影合照, 今時今日真係有難度, 因為樂樂係唔會停落黎!

寫網頁

今日傾盆大雨下, 去咗學寫網頁!

電腦呢一科真係深奧... 見D專家寫幾隻字, click 幾 click, 就搞掂! 自己慢慢摸, 真係有排搞。 學咗一個鐘, 成個醒晒! 依家清楚好多, 起碼可以自己試吓試吓, 真係越黎越有信心!

Fishmum.com is coming soon!

吹BB

樂樂返幼潛, 上兩堂學吹雞, 當時試吓, 仲未識。返屋企練咗幾次, 依家吹到BB聲...犀利呀！

小如 - 測驗週

終於黎到呢個學期嘅尾聲, 最後一次測驗。 June 5-11, 一如過往, 我就要努力陪佢温習, 謝絕一切應酬, 全職媽媽....好偉大呀！