認生字

十幾個中文字, 識晒呀, 叻仔! 返咗3個月學, 真係要頒個飛躍進步獎比佢呀 ~~ 正如老師都讚佢依家乖咗好多, 好記性, 學嘢快, 上星期收到通知樂樂可以係原校升 K1 呀, 可喜可賀, 唔洗再撲學校啦!

食得是福

小如同樂樂由細到大都鍾意食嘢, 好記得同小如出街食飯, 見到D餸實第一時間嘩一聲, 所以我哋唔會明白人哋D父母點解迫小朋友食飯。依家每次開飯, 樂樂一定係第一個埋位! 不過佢近來唔肯食菜, 成日話 no choy choy, 一見到肉就開心啦 ~~ 小朋友, 食得真係是福!

Christmas tree

踏入12月, 聖誕氣氛吹緊黎啦! 我哋都開始佈置聖誕樹 ~~

今年買咗棵同我咁高嘅聖誕樹, 好開心 :) 以前果棵仲矮過樂樂, 唔洗5分鐘佈置完架啦。今次呢棵5呎高, 有排玩!

親子聖誕咭設計

今時今日, 返學己經唔係小朋友一個人嘅事....每星期嘅功課, 咪都係亞媽嘅功課囉! 每逢喜慶節目, 做手功嘅 >> 咪又係亞媽!

陪小如做咗咁多年功課加親子勞作, 今年輪到陪樂樂做啦。聖誕就快到, 梗要整張聖誕咭參加學校舉辨嘅設計比賽啦! 我哋今次呢個設計, 都好有心思架, d 雪花係樂樂貼架, 裡面都係佢整嘅, 希望可以攞返個安慰獎啦 ~~

冇工人的日子....

最後一日啦, Yeah! 工人姐姐嘅三星期大假終於完啦, 今晚返咗黎呀!

呢三個禮拜好似好漫長, 但都好彩 ~~ 有如爸放咗兩個禮拜幫吓手。其實D工人姐姐都幾能幹吓, 一個家真係好多嘢做架! 每日我哋兩公婆分担家務都好鬼攰, 試唸平時工人姐姐一脚踢幾好嘢。今次工人姐姐放假, 小如都好乖好幫手 (查實佢執好自己D嘢己經幫到啦), 又學拖地, 涼衫, 仲有煮餸添喎!

另類生日派對

成日參加生日會嘅地點, 不外乎老麥、炸雞店同薄餅屋等等。小如今日去咗一個好特別嘅派對 --> YMCA Indoor Climbing Wall !

佢話好好玩呀! 初初爬幾級試吓玩, 之後仲越爬越高添, 好刺激咁話 ~~

冬遊迪迪尼

自從搬咗屋, 都好耐冇探米奇米尼啦! 趁小如考完試, 又有 雪亮聖誕, 去玩吓啦!

小小世界門口多咗幾個場景比大家影相留念, 兩姊弟都影得好開心呀!

小小世界都好有聖誕氣氛, 連史迪仔都有戴聖誕帽!

樂樂呢排好仲意學家姐 ~~ 睇吓, 又幾似!

Sanrio Village

今日去咗青衣城, 參觀呢個叫做 << Sanrio Village 50個聖誕傳奇>> 嘅展覽。可能係平日, 唔算多人, 雖然場地比想像中細, 但D公仔又真係幾靚架！









睇完D公仔, 一家四口就响青衣城食飯。原來仲有個八達通 密密食 密密日日賞 嘅推廣, 用消費張單, 仲贏咗十幾蚊易賞錢呀!