Goodbye 2009

大除夕, 放工人姐姐假 (唔洗煮飯), 一家去咗魚翅城食飯。D 餸幾好架, 但講到正, 要推介佢嘅 "杏汁撞蛋白", 杏味十足, 蛋白又唔怕老, 仲唔太甜, 好好味!



吃完飯, 兩公婆唸住久日都唔睇吓戲, 去睇返場"風雲2" (得佢仲有位!), 入場等咗15分鐘都開唔到場....條片壞咗喎! 唔係化 ~~ 今晚冇買六合彩添!

查實又冇乜嘢嘅, 因為都唔係特別想睇。最後換咗兩張聽晚嘅阿凡達 (貴一倍, wakaka) 同埋有多兩張贈卷, 阿Q D唸 ~~ 賺咗兩舊幾水吖!

元旦日有免費戲睇 >> 一定係寓意我新一年行大運啦!

Happy new year to all of you!

Cup cake

學校假期, 梗要揾D活動消磨時間! 小如就去 明愛九龍社區中心 參加咗兩日嘅整蛋糕班。學整咗香蕉鬆餅同士多啤梨芝士凍餅, 似模似樣架, D 製成品仲好好味呀!

至爽係細佬啦, 坐享其成淨係食 ~~



想唔想學整先?? 試吓吖 ~~

材料 (3個鬆餅份量)：

麵粉 28 克
全麥粉 28 克
發粉 1/2 茶匙
牛奶 28 克
黄糖 24 克
蛋 　 1/2 隻
牛油 24 克 (用熱水座溶)
細香蕉　1 隻

做法：

1. 焗爐預熱至 200 ℃ 。
2. 香蕉用叉壓成茸, 備用。
3. 把麵粉、全麥粉、發粉篩入容器再加入黄糖。中央作出空心圓圈。
4. 牛油溶液、牛奶及蛋用叉拌勻, 慢慢加入 (3.) 中, 一邊用木匙慢慢拌勻。
5. 最後加香蕉茸拌勻。
6. 把麵糊平均分入鬆餅杯。
7. 入爐焗約 20-25 分鐘。

開心到"飛"起派對

Dec 26, 2009 (lunch)

Boxing day 同廿幾個 BK 0705 小朋友去 Hong Kong Aviation Club 開party 呀!

話明聖誕 party, 應吓節小如扮咗棵人見人愛嘅聖誕樹, 超可愛呀, 好多小朋友爭住影相添呀!



個場地外面仲有架飛機比小朋友玩, 好新奇。

唔可以唔讚吓班好能幹嘅媽咪 ~~ 訂地方, 揾贊助, 送禮物, 收爛數...辛苦晒!

Birthday dinner

Dec 26, 2009 (dinner)

馬不停蹄, 晚上係契婆嘅大生日, 帶咗兩位老細一齊賀壽。去飲 ~~ 梗係飲 look 啦, 小如果條紫色絲絨長裙, 好靚架 (可惜着埋今次應該唔啱着囉), 樂樂就係斯文靚仔恤衫加白背心。



成晚又食又跑又跳玩到癲, 勁 happy!!

Merry Christmas!

Dec 25, 2009

Christmas day, 係四人世界! 先去又一城行街, 睇燈飾, 影相, 再去揾個地方食大餐 ~~ 冇訂位都比我哋响 Pizza Express 揾到位, 食個好味 pizza, 仲見到大 Bear Bear 熊呀!

聖誕晚餐 >> 係兩位老細至愛嘅跑馬地馬會 playroom, 玩完一輪再食 buffet!

樂樂仲唔洗錢喎, 食咗幾隻大蝦, 魚蛋米, 當然仲有加滿 topping 嘅 Movenpick, 抵晒 :) 小如都自己炮製咗個聖誕大餐盆呀! 呢位聖誕老人仲送咗真禮物添喎 ~~ 小熊仔兩隻, very cute 架!

平安夜 ~~ 擦餐勁!

上個星期....實在好忙!

小如做完場商場 show 後嘔吐大作同發燒, 學校 Christmas party 都冇得去, 好擔心一連串嘅聖誕活動都冇份! 好彩兩日就好返好多啦, 第一砲就係去爺爺屋企食聖誕大餐 ~~

Dec 24, 2009

嫲嫲為大家準備咗大火雞同好多美食>>大蝦沙律, 燒火腿, 雞翼....! 姑媽問朋友借咗件聖誕樹衫比小如去 party, 樂樂見到又要扮吓!



亞爺呢棵聖誕樹好正~~有 bell 之餘仲有利是! 之後到交換禮物環節, 至開心梗係樂樂啦!

學校裡~~迎聖誕

樂樂間幼兒園真係好多活動, 迎聖誕, 又有佈置啦。今次係米奇米尼着聖誕衫, 係小朋友見到都笑騎騎啦!

仲有維尼同跳跳虎添喎!

最令人感動嘅莫過於呢張 ~~ 送比爸爸媽媽嘅聖誕咭 >> 着晒聖誕衫之餘又有佈景, 又望鏡頭, 仲鬼咁可愛添噃!

色士風

去 party 交換禮物 ~~ 我哋抽到呢個色士風, 小如同樂樂都好仲意呵! 雖然唔係真係吹得, 但都好新鮮喎, 好努力學玩添!

Look! 幾有感情 :)

側面係咪仲有型呢!

商場 Jazz show

呢排小如好忙! 一連串嘅聖誕節目, 表演, 又要準備參加校際舞蹈節同學界體操比賽, 仲加上 Jazz 學校選咗佢參加年初一花車巡遊表演....個時間表仲緊密過特首!

今日第一擊 >> SDM 奧海城 Jazz show! 野人 look, 有型之餘亦跳得好好呀!

廚房男

又去 party 啦! 今次呢個姨姨屋企, 有樂樂最鐘意玩嘅模型屋仔, 仲可以穿返條圍裙扮廚房男, 係咪好 family man feel 呢 :)

It is party time!

一連串嘅爬哋黎啦! 今次係黎我哋屋企 >> 6 個小朋友, 全部唔同大小, 但都玩得好開心呀! 又有得食, 又有得玩, 仲有交換禮物添!

聖誕燈飾

迎聖誕, 梗要睇吓燈飾, 應吓節! 近近地, 去咗奧海城 ~~ 銀色聖誕樹, 始終好似冇綠色咁靚!

Christmas party

樂樂間幼兒園搞咗個聖誕趴地, 全校大都份學生家長都有參加, 有成幾十圍, 好熱鬧呀!

上次校內嘅聖誕咭設計比賽, 我哋嘅作品竟然得到班上的第三名。就係綠色樹型有d 雪花果張呀 ~~ 雖然都好有心思同幾靚, 但响衆多作品中, 我哋呢張真係濕溼碎! 有D高年班嘅作品, 仲有閃燈架!

好榮幸地有得上台領獎添!

學校都好識做, 安排所有參加嘅小朋友上台表演! 樂樂都好叻呀, 坐定定, 冇喊, 仲有跟住做動作添 :) 美中不足係佢唔肯帶果個有聖誕樹嘅頭箍!

Project approach

啱啱先整完親子聖誕咭, 樂樂學校又玩 project approach 啦 (洗唔洗谷得咁勁呀!!)

全個星期要搜習「梨」嘅資料: 款式, 形狀, 生長過程, 製成品...等等, 所有呢D嘢, 咪又係媽咪做囉! 今日話要帶一種梨的加工食品或利用梨子調嘅美食返學, 梨子大食會喎 :)

下星期一仲要交親子功課 >> 小冊子或食譜 ~~ 我梗係整食譜, 可以上網揾嘢抄啦嘛!

製成品 ---> 就係呢本小食譜啦, 介紹嘅餸菜係 「甜酸梨脯炒雞球」同「雪梨乾杏仁陳腎湯」呀!