吉屋大掃除

好好彩地揾到屋搬啦, 九月小如同樂樂都可以行路返學, 夢寐以求嘅居所 (不過冇錢買...)

屋主好好人, 早左成半個月比鎖匙我哋, 今日揾左間清潔公司黎幫手吉屋大掃除。我响網上揾左 呢間, 唔洗預繳, 又比較平, 做唔完可以即時加鐘, 咁總好過比晒錢又唔知好唔好。

其實清潔一間舊屋比新屋真係要多好多時間, 多好多功夫 ~~ 間屋又大, 又多窗, 淨係洗抹冷氣機都個幾鐘, 雖然兩個亞姐不停手做, 結果自己幫埋手都抹左7個鐘, 一分耕耘一分收獲, 當堂感覺乾淨晒!

執行李

執行李嘅係小如呀!! 星期六去日本玩一個禮拜 ~~ 不過我冇份去 :(

係姑媽帶佢去東京....心情好緊張, 好期待, 好興奮, 今晚已經執定行李添! 好認真地執足一星期嘅衫褲鞋襪, 日常用品等等, 好彩都係一個小喼仔遮, 希望佢唔好兩個喼返來啦....

Yummy dessert!

早前去左 JW's California 食龍蝦 buffet, Ｄ食物, OK 啦。反而呢個甜品, 人人都歡喜 ~~

咩黎?? 扮雪糕?? 個 cone 係新款果撻而上面果舊朱古力野係 Profiteroles 呀, 好好味!

樂樂真係冇性格, 邊個有野食就痴邊個, 你有野食, 錫你幾啖都得呀!

K lunch

小如近來愛上粵語流行曲, 當然唔係聽我果個年代嘅歌星唱嘅歌啦 :) 依家D新人, 莫講話佢哋D歌, 連佢哋D名我都唔識!

今日帶左小如, 樂樂加埋輝輝表哥, 去左 Karaoke 見識吓。Neway 真係好多新歌, 原來仲有兒歌架喎, 加埋可以上網, 好正! 我哋去果間嘅午餐時段每位$44 , 學生$39免加一, 個 lunch 有10款選擇, 仲有杯飲品, 都幾唔錯架, 唱到唔捨得走!

繽紛水世界

星期日去左雙魚河會所玩, 咁啱游泳池舉行「繽紛水世界」, 樂樂都入得喎, 梗要玩吓啦! 有好多個好玩嘅水上遊戲, 又有水上滑梯, 又有水上獨木橋, 又有水上障礙賽外，勁好玩!

樂樂雖然唔到地, 但都冇有怕照玩! 佢梗唔怕啦, 又貪玩又狼C, 我驚過佢; 玩左一陣拿拿聲的佢上水玩吓D BB 遊戲~~

姊弟波鞋

攪乜樂樂咁 Happy?





有新波鞋呀! 大家應該都有買過情侶波鞋, 又或者親子波鞋, 但姊弟波鞋...小有呀呢! 其實波鞋有時 D 顏色都有分男女, 有D款又冇 BB + 童裝 size, 終於 ~~ 買左呢款一模一樣, 最開心嘅當然係家姐啦! 但係小如已經要着童裝最大碼, 再大D着大人款就好難再買姊弟波鞋囉。

樂樂被鬧的時候....

樂樂有幾曳大家應該有聽聞....有時EQ被佢挑戰至極點, 忍無可忍都要鬧!! 加埋藤條兇佢一兇, 呢個情景就會出現 ~~



揾家姐做靠山, 攬到實, 又嗲, 家姐開心到不得了!

Summer Day Camp

期待已久嘅 YMCA "Kids Fit 大搜查" 終於開始啦! 每日9am-5pm, 小如真係好似返工咁呀 ~~

成日流流長有咩玩? 唱吓歌, 玩吓遊戲, 認識吓新朋友, 日日唔同嘅活動, 仲有一日游水, 一日去迪士尼添。今日第一日, 小如話佢食左三碗飯、兩碗湯...有幾開心可想而知!

作為一個基督教機構, YMCA 仲有D詩歌教小朋友添! 今日教呢隻:

宇宙的第一個星期

Typhoon number 9

颱風「莫拉菲」正面吹襲香港，尋晚半夜掛嘅9號風球, 對我哋影響唔大 (因為訓晒覺都唔知有幾大風)。但今日一早仲未落波, 就令到小如參加左嘅 scuba diving 班要取消!

今年幫小如報嘅暑期活動真係...買小見小! 有D收唔夠人又取消; 呢個因為打風又取消; 好彩聽日終於有一個 9am-5pm 嘅日營開鑼啦!

點搞呀...冇電!

今朝同小如一齊執完屋, 正準備帶樂樂返學, 點知冇電呀! 原來屋苑一早出晒通告話電力測試喎 (停電3個鐘), 我哋當然冇留意到....係毫無準備下, D雪條溶晒啦!!

最惨都莫過於要我負重30磅, 抱住樂樂落左廿幾層樓梯, 脚都震埋! 到依家雙脚仲好似唔聽洗咁....

小如的9歲生日

今年嘅生日, 請左幾個朋友仔一齊食吓嘢同玩吓, 雖然唔係好多人, 但都好熱鬧同好開心!

為左增加氣氛, 買左個 pull-string pinata, 預先入左好多糖入去架!



排住隊逐個試拉 (得一條繩開到個盒), 點知 ~~ 好刺激...拉到尾二果條先開到!



嘩! D糖跌落黎果一刻, 勁開心 :)




切蛋糕啦! 真係插足9枝蠟燭架 >> Happy Birthday to Nicole!

糖果嘉年華

放暑假, 但暑期活動又未開鑼, 成日要唸 D 好玩、有益又有建設性嘅節目。迪迪尼去過幾十次, 咁晒咁熱又冇理由海浪公園架嘛!

知到最近 科學館 搞左個 糖果嘉年華 (Jun 26-Oct 28, 09), 又室內又有教育意義, 最好不過啦, 仲比想像中好玩, 小如玩到唔肯走呀!

除左糖果呢個專題展覽之外, 原來科學館都好多嘢睇架! 最好嘅係好多設施都可以試玩, 玩樂中學習, 最好不過啦!

你睇樂樂, 砌骨頭又識, 拉泡泡又識, 真係動靜皆宜喇!

A day in the countryside

俗語打風唔成三日雨, 風球一落, 點都估唔到咁好天! 拿拿聲收拾細軟, 去 Beas River Club House 享受吓陽光!

今日佢三父子女仲出晒親子 tee 添!

除左游水同去室內遊戲室玩之外, 小如仲騎馬添噃! 細佬冇份呀, 因為要3歲以上先可以騎, 都好嘅, 如果比 >> 我都好担心樂樂會响馬背跳落地~~

New playroom

曾經陪伴小如成長嘅沙田馬會 playroom, 早前因為要裝修, 關門大吉。事隔幾個月, 終於開返啦! 大左又靚左; 又有室內, 又有室外; 又有 xbox, 又有 wii, 玩到唔肯走!

小如要箍牙

今日去左邊到玩? 係咪以為 Club house、playroom 之類呢....其實係去左陪家姐箍牙呀! 係牙科診所 Adamant Dental Centre 黎架 ~~

打正名號係兒童齒科, 主要顧客係小朋友多, 診所有個小小嘅地方比小朋友玩, 等嘅時候包唔會悶啦! 整牙果陣仲可以揀隻自己喜歡嘅 CD 睇, 好週到架!

講返小如點解要箍牙~~其實係佢嘅一隻門牙兩年都未出, 照過 x-ray 話隻牙唔啱位不特止, 仲响好高嘅位置, 冇跡象顯示會出, 所以牙醫建議去睇牙齒矯正科專科, 睇吓有乜計。

好多謝一班朋友提供嘅牙醫資料, 結果揀左呢間 (如爸有兩個同事嘅仔女都幫襯緊)。醫生檢查過後, 做法係先用3個月拉返正旁邊D牙, 等到夠位, 再做手術介開牙肉, 痴個牙箍慢慢拉隻牙落黎! 呢個醫生比左兩個個案嘅相我哋睇, 講解好清楚, 所以辛苦都要整啦, 小如!

網上學習

放暑假, 有咩做呢? 除左報D暑期活動之外, 學校都推介左D網站比同學睇。

我覺得呢個好正 : Woodlands Maths Zone 上網做 maths, 仲可以計時, 幫你 check 埋答案, 真係一流!

仲有呢幾個中文網站, 都可以比小如消磨吓時間 :)

中華里

成語動物園

故事王國

Music class

自從樂樂表演過摩打脚跳 Wow! 加掃堂腿比大家見識過之後, 係咪覺得佢好有節奏感呢?

為左再發掘吓佢有冇音樂細胞, 尋日同班BB friends 去左 Orff4kids 試吓個「德國奧福音樂班 - Orff Music & Movement Course, Grade 2」!

出乎意料地, 我唸樂樂幾仲意噃 ~~ 課程內容都算幾充實, 一個鐘頭絕無冷塲, 好開心呀! 雖然唔係真係教你彈綱琴同拉小提琴, 但都有好多唔同種類嘅敲擊樂器比佢哋試玩, 比起平時上嘅 playgroup, 真係有D唔同, 所以會繼續學呀!

升班啦!

無端端早左放暑假, 不過都算好彩, 考完晒試!

到今日, 學校安排左家長去攞成績表同派返晒D功課, 真係正式放暑假啦...話咁快小如就四年班囉!

學校裡面嘅課室分別設於新、舊翼大樓, 一至三年班係舊翼, 四年班開始會去新翼果邊上堂。小如好開心呀....對學生黎講, 四年班就等如大個女, 因為新翼果D全部係大姐姐黎呀!

Fun time at the beach!

舊年七一同左一班 BB friends 去黃金海灘, 好好天, 十幾個 BB 玩得好開心!

今年都係一樣嘅節目呀! 事隔一年, 班 BB 識行識走, 仲玩水玩沙添!

現塲實碌....玩吓浪先!

跟住仲扮勁自己游添 ~~