小如要箍牙

今日去左邊到玩? 係咪以為 Club house、playroom 之類呢....其實係去左陪家姐箍牙呀! 係牙科診所 Adamant Dental Centre 黎架 ~~

打正名號係兒童齒科, 主要顧客係小朋友多, 診所有個小小嘅地方比小朋友玩, 等嘅時候包唔會悶啦! 整牙果陣仲可以揀隻自己喜歡嘅 CD 睇, 好週到架!

講返小如點解要箍牙~~其實係佢嘅一隻門牙兩年都未出, 照過 x-ray 話隻牙唔啱位不特止, 仲响好高嘅位置, 冇跡象顯示會出, 所以牙醫建議去睇牙齒矯正科專科, 睇吓有乜計。

好多謝一班朋友提供嘅牙醫資料, 結果揀左呢間 (如爸有兩個同事嘅仔女都幫襯緊)。醫生檢查過後, 做法係先用3個月拉返正旁邊D牙, 等到夠位, 再做手術介開牙肉, 痴個牙箍慢慢拉隻牙落黎! 呢個醫生比左兩個個案嘅相我哋睇, 講解好清楚, 所以辛苦都要整啦, 小如!