寶寶成長路

今日去咗健康院聽講座, 聽吓18-24個月BB嘅發展。呢段期間都不外乎係學講嘢, 正面管教, 同介片等等。大家如果想要呢Ｄ小冊子, 可以睇 健康資訊一歲至三歲親職教育。

姑娘仲播咗一個 video, 大家可以用5分鐘睇吓呢條 link, 1-2歲果條片呀!

寶寶成長路 ~~ 本片旨在讓家長了解孩子於零至三歲的體能、手部操作、社交情緒、語言及認知等發展，從而給予孩子適當的培育。

又趕兩塲!

下午又有BB趴地, 係响一個朋友企嘅會所搞, 今次小型D, 30 個 BB 到啦! 好多謝有份搞嘅媽咪, 由訂塲地, 到訂食物, 到交換禮物, 仲有Ｄ媽咪自制愛心甜品, 好唔話得! 點解冇相睇?? 由去到會所開始, 我同如爸就係咁追住樂樂, 邊度有時間影相呀。

跟住就要去飲啦 ~~ 樂樂第一次去飲呀! 銅鑼灣利舞臺 彩福皇宴 好似話新開嘅, 真係幾靚喎! 歐陸式禮堂, 起碼有20呎高, 仲有變色嘅燈光, 加埋一對新人响旋轉形雲石樓梯行落黎，非常之有氣勢!

食物質素都好好呀, D 嘢上枱係熱辣辣架! 搵緊地方擺酒嘅朋友不妨睇睇呀!

It is boxing day!

尋日跑咗兩個 party, 五大袋禮物, 小如一早起身就開工拆啦!

大家先睇吓有幾多......拆到手軟呀!



真係多謝晒各位嘅禮物 :) 希望大家有個美好嘅 2009 年!

Joy to the world

又到聖誕, 又到聖誕! 一家大小 11 人一齊慶祝吓! 豐富嘅晚餐, 好有氣紛嘅佈置, 聖誕老人派禮物, 小丑魔術助慶.....仲有全家人交換禮物!

返學唔喊啦!

樂樂11月開始返自己上堂嘅 playgroup, 堂堂都喊! 結果老師比我陪佢上堂。上咗成個月, 都仲有四位家長要陪BB, 老師覺得唔對路......下令全部都冇得陪, 有得佢哋喊!

唔知佢係咪真係認得 >>> 每次去到學校樓下, 樂樂就開始飲泣 :( 入到課室由上堂喊到落堂, 每次落堂佢都係第一個跑出黎, 一見到我就騎騎笑!

不過小朋友係不斷進步嘅, 結果一堂好過一堂, 今日開始冇喊啦。放學返到屋企仲自己開門添!

咁乖梗有獎啦~~ 糖糖一粒, 睇吓幾開心!

姊弟裝

靚唔靚呢? 上次去開倉買架, 大碼$30, 細碼$20 喳! 歐洲牌子果然質料一流, 小如話.....未着過咁舒服嘅運動裝喎!

Love is ......

Love is patient, love is kind .... love never fails! (1 Corinthians 13:4, 8 NIV)

近來好多親友踏入人生嘅新階段, 戥佢哋開心嘅同時, 梗要參加佢哋婚禮啦! 今日有舊同事結婚, 响天主教教堂行禮, 感覺有Ｄ熟識 ~~

10 年前我哋嘅婚禮都係天主教形式, 地點係 聖瑪加利大堂。

仲好記得當日:
好莊嚴嘅教堂, 加一大班兄弟姊妹, 仲有好多親朋好友, 熱鬧非常!



仲好記得當時:
嘅承諾 "許諾從今以後, 無論環境順逆, 疾病健康, 我將永遠愛慕尊重你, 終生不渝。"

在此誠心祝福各位新婚嘅朋友 ~~ 白首偕老, 永遠幸福!

Thomas & Friends X'mas Wonderland

Date: Dec 12, 2008 - Jan 1, 2009

Time: 1200pm-8pm

Venue: Discovery Park Shopping Centre (荃灣愉景新城)

有乜玩? 等小如介紹吓: 有手工製作, 玩泥膠, 砌大積木, 射箭..... 矮過 1 米仲可以玩充氣彈床添!