歲半發展監察 ~~ 下集

上星期講到去健康院 歲半發展監察 肥佬, 結果要再約見醫生作評估。今日見醫生, 玩Ｄ乜?

首先比Ｄ積木疊吓高 (ok), 比個公仔同梳你玩吓 (ok), 比個杯同匙羹扮餵食嘢 (都ok)! 其實呢Ｄ日常生活嘅常規, 樂樂係無問題嘅。

跟住:

比四樣物件 (車仔、波、杯、匙羹), 叫你攞車仔 (唔識),

比唔同嘅圖形各兩塊, 叫你分類 (唔識),

比一個樽仔, 裡面有两隻萬字夾, 考吓你識面識倒隻夾出黎 (都唔識)。

玩玩吓跌左個樽仔落地, 樂樂即刻跳落地執返, 大肌肉當然冇問題! 一放佢落地, 梗係四圍搞嘢.....醫生叫人個咪啦, keyboard 啦, 櫃筒啦, 仲差Ｄ拉咗醫生個水樽落黎 ^-^

然後再始考講嘢, 當然唔會係一個星期之內學識晒啦! 但係好彩叫佢拍手, 飛吻, bye bye 嘅動作都做到。 bye bye 完醫生仲拿拿聲幫我攞手袋添!

醫生話樂樂都有一都份嘅表現未達標, 問我担唔担心, 如果想再檢查清楚D可以再轉介評估! 唔洗拿呱, 講真我一D都唔心喎, 淨係担心樂樂一識講嘢會唔停咀喳!

冬裝上塲

地球暖化問題, 令到我今年都仲未着過冷衫! 其實雖然話十幾度, 好似幾凍, 但係呢個冬天, 日日都有太陽, 樂樂嘅冬裝.....只不過係咁!



玩起黎, 仲成身汗添!

BB床

對於活潑好動嘅樂樂黎講, BB 床已經唔適合佢訓, 因為佢好多時夜晚醒咗都會爬出黎, 所以都係時候轉訓子母床啦! 所以呢排物色緊床墊, 床欄等等, 適逢依家好多地方都有減價, 可以慢慢揀呀。

黐身膏藥...

近呢個月, 樂樂變咗我嘅一塊 >> 黐身膏藥!

咩原因? 我唸係大個咗開始識得搵佢信任嘅人, 應該係安全感作怪啦。 11 月起佢開始自己返 playgroup, 但喊足幾堂都要搵我入去陪佢, 加上病咗嘅時候驚佢夜晚嘔奶同發燒, 所以係我陪佢訓。點知就咁就搞到佢成日黐住我, 連我去廁所佢都企响門口等!

最近睇咗一些幾好嘅文章~~關乎管教子女。大家可以睇吓 「社會福利署家庭生活教育資料中心」-- 家庭生活樂園 (資訊廣場) 入面嘅 (管教子女) 文章, 這些文章均由家庭生活教育社工撰寫，並曾於各大報章雜誌刊載。

暖笠笠毛巾鞋

樂樂响屋企從來都唔着拖鞋, 因為會阻住佢擒高擒低!

但係天寒地凍, 冇好得過暖吓隻脚仔。呢排好興呢款毛巾拖鞋, 輕身, 保暖, 個底仲有防滑粒粒添~~ 廿蚊有找添呀, 大人細路都啱着, 快Ｄ買返對。

歲半發展監察

今日到樂樂去 健康院 做 發展監察 ~~ 一如所料, 梗係肥佬! 通常如果各樣發展正常, BB 就到四歲先再去健康院; 肥佬嘅BB, 兩歲要再返都評估。

但係樂樂可能生得靚仔 :) 姑娘想再見多佢幾面, 所以要下星期再返去, 同醫生見吓面再評估喎! 其實我未聽過有得比醫生評估, 都好, 交咗咁多稅有返小小福利。

測D乜嘢? 我覺得樂樂表現Ok喎! 識疊積木, 仲識餵公仔飲水添, 只係講嘢同表達差小小之嘛.....例如

唔識講有意思嘅字
唔識指媽媽, 爸爸
唔識指眼耳口鼻
想要一樣野唔識指 (因為佢習慣想要一樣野就擒去攞)
最大獲係你叫佢個名佢都唔 so 你 (very cool!)

但其實我一D都唔担心, 因為佢識嘢我唸好BB都未必識喎:

例如你話去街啦, 佢識膨膨聲開鞋櫃攞鞋;
去完街返屋企, 第一時間攞張櫈仔企高洗手;
呢兩日咳果陣仲識拍吓心口;
有鼻水仲走去攞個揼入個鼻到吸....不知幾醒!

Charlie Brown Cafe

今日全家出動參加小妹妹 Momo 嘅一歲生日派對! 壽星女好靚呀, 着晒公主裙, 唔怕醜冇扭計仲任人抱, 真係乖!

去邊度開 party? 唔係麥當當, 唔係老人雞, 又唔係食 pizza 喎! 好新穎嘅地方 ~~ Charlie Brown Cafe 。

環境好好 (有間房仔可以坐廿幾人), 食物好味 (buffet style), 招呼都好呀! 如果人小小嘅聚會, 不失為一個好選擇。

10th Anniversary!

結婚10週年紀念, 原來叫做 Tin wedding 錫婚。面對全球金融海嘯, 唔敢買幾卡鑽戒, 唔敢擺返幾廿圍! 眼見多個國家笠笠亂, 又唔敢去旅行!

點慶祝? 二人世界撑吓枱脚咁囉 ~~

咁靚嘅地方係.....Felix 。呢間餐廳都幾有創意.....個 menu 雖然唔係好多嘢揀, 但我唸廚師真係好用心創作菜式。

食咗 D 乜? 我叫嘅頭盤係 " Duck egg, Uni, Pork belly" ~~ 從來冇唸過呢三樣嘢可以一齊食! 結果係出乎意料哋好食, Yum Yum Yum!



主菜我揀咗 Black Cod 同魚子醬, 都好好, 食嘅時候Ｄ魚係脆嘅!

呢個甜品嘅賣相好靚! 係 Raspberry 下面嘅果凍真係好味!