2008年9月29日星期一

樂樂嘅發展

今日覺得樂樂開始懂事.... 由BB時代, 樂樂嘅發展成日都慢人兩拍, 見到有D BB friends 可以坐底定定哋睇書, 認生字, 自己拮西瓜, 仲識講好多嘢(甚至講句子), 但樂樂最叻只係爬高爬低, 跑黎跑去! 其它嘢, 唔知佢係唔識定係深藏不露。

中午食飯果時, 係雪櫃攞埋包提子出黎, 樂樂冲埋黎想食, 我同佢講要食完飯先食得, 跟住我放咗包提子响廚房。到食完飯, 我唔記得咗啦!點知佢企係廚房門口 (佢知到唔可以入去), 望住個升盆, 係咁 "up" 頭 (呢個動作係代表想食), 幾搞笑 ~~ 原來佢咁好記性!

其實BB嘅發展真係快慢都冇所謂~~做媽咪嘅要好好享受BB隨時帶比你嘅驚喜呀!

2008年9月28日星期日

Fishdad's birthday

如爸生日, 我選擇豪一次去 W !

出發前, 兩姊弟深情對望一番, 好感動的畫面。


好靚, 好時尚, 好特別的 W Hong Kong ! 等小如帶大家參觀吓酒店 ~~



我哋定咗 "Kitchen" = 即係類似 cafe 啦! 裝修簡簡單單 , 加上有無敵海景, 入到餐廳有點心曠神怡嘅感覺!

呢張係樂樂有史以來, 坐過最豪嘅 BB high chair, 可以360咁轉架。佢當然坐唔定....轉個頭跟咗個廚師哥哥去偷食 blue berries!


我嘅最愛 Beef Carpaccio 呀....


生日點都要有個蛋糕仔, 許個願! 叫咗個好嬌小嘅 cheese cake, 由三個唱住歌嘅姐姐哥哥護送埋黎, 行緊果時仲收埋係後面製造驚喜添! 今時今日, 咁嘅先係叫服務態度嘛!




2008年9月27日星期六

反斗車王嘅生日會

下午去参加 Oliver 嘅生日會, 嘩好多車玩! Auntie 好細心, 由佈置到紙杯、到蛋糕、到送比大家嘅小禮物, 都係反斗車王架! 仲有自家製嘅生活點滴 Slide show (襯埋 backgroup music), 個 party 真係值一百分!




樂樂玩得好開心, 唔洗人扶自己澎澎聲走去 "sir" 滑梯, 好刺激咁呀~~




仲有名貴跑車玩, 雖然唔識揸, 但架車曉自己行架 (原來係可以用 remote 控制呀)! 仲有間屋仔玩, 不過破壞王樂樂一入去就搞到反咗。



2008年9月26日星期五

創作天份

今個月返英文班, 做咗好多勞作。 為咗應節, 有燈籠同中秋賀咭, 睇吓係咪好似好有心機呢!


老師教整海棉印畫賀中秋, 樂樂就冇用海棉, 親手搞咗一張!

其實應該咁整, 不過唔緊要, 我覺得佢果張另有一番風味....有D似梵高~~
呢堂係整八爪魚>>>>>大家先留意吓張枱有幾乾淨先!


跟住>>>>>變成咁!


可憐嘅八爪魚, 最後仲比樂樂揻甩咗隻爪, 變咗七爪魚呀陰公!

2008年9月25日星期四

小如嘅新玩具



咩黎? My personal bank (港幣自動提存機)

曾幾何時, 我哋細個玩橡筋繩, 跳飛機, 拍公仔紙~~ 隨住科技進步, 依家小朋友玩 NDS, Wii, PSP, Xbox.... 甚至連玩具都電子化!

呢部機嘅功能有: 硬幣存款, 紙幣存款, 儲蓄目標設定, 仲可以查詢結餘 >@@< 勁唔勁!

玩具都可以自動識別到金額, 好利害! 唔信? 下次帶定錢, 叫小如試比你睇吓!

2008年9月24日星期三

又打風啦

尋日果個八號風球(颱風黑格比)....好勁!

唸住一早出去超級市塲入定D貨, 一號風球已經好大風, 到夜晚直頭 "fee fee" 聲, 犀西過上次十號風球好多! 好彩個風半夜過咗, 今朝仲唔洗返學。 悶咗一朝, 下晝帶咗兩位老細去沙田行吓街, 因為打風無嘢好得過行商場 :P

食咗餐日本 lunch, 好正呀!除咗我幫佢叫果個 set lunch, 小如自己仲叫咗帶子壽司同軟殼蟹手卷, 好識嘆!

2008年9月21日星期日

熱爆郊遊



同幾個 BB 朋友仔去 Beas River 郊遊, 游吓水, "sir" 吓滑梯, 享受吓大自然.!

為咗隆重其事, 小如同如媽仲着咗對親子 Crocs 添! 去到游池, 四個 BB 有着四種不同性格: 有衝動型, 有斯文型, 有沙膽型, 亦有慢熱型! 兩位靚女 ~~ 一個坐住水泡响池邊玩玩水, 不知不覺比爸爸推咗去池中間; 一個由三米高大滑梯 sir 落黎都面無懼色 ..... 樂樂當然 sir 大小滑梯冇有怕, 今次仲由家姐同佢玩!




下午去咗户外遊樂塲, 樂樂除咗表演徒手爬滑梯, 仲有除晒鞋追吓女仔添 :>


有幾熱? 睇吓! 結果熱到爆轉咗去 playroom 嘆吓冷氣! D 細路由朝早玩到下晝, 勁!




2008年9月20日星期六

歡送舊工人姐姐

姐姐今日一早走咗啦! 做咗四年, 都有D唔捨得! 慶幸係小如經過我哋一輪輔導, 都無乜唔開心!

尋日趁住迪士尼有 "一拖一" 優惠, 帶咗新舊工人姐姐一齊去玩吓!但估唔到....好多人!

一去到, 樂樂好乖坐定定睇巡遊, 仲同D靚姐姐 say 個 Hi 添! 睇完巡遊, 已經熱到成身濕晒, 大熱天時, 當然無嘢舒服得過食返枝雪條啦!




小如仲意玩架啡杯, 莫講話玩, 我睇見都暈! 所以佢為有自己玩啦!





唔知點解, 睇咗十幾次烟花, 都仲覺得好正!


2008年9月19日星期五

校際游泳比賽 -- 選拔試

學校為了選出代表参加 校際賽, 安排咗選拔試比學生参加。 雖然小如游唔到要求嘅資格, 但都抱住一試嘅心情参加咗。 結果都可以順利游畢 50 米 (自由式同蛙式), 畢竟佢唔係日日練水, 游畢全程已經好叻。選拔試結果要遲 D 先會公佈, 入選與否, 都不失為一個好好嘅經驗。

2008年9月17日星期三

靚媽咪吹水 dinner

尋晚同一班一齊搞今年 BB 生日 party 嘅義工媽咪出黎慶功 ~~ 無錯, 搞完 party 四個月先慶功.....正所謂有心唔怕遲吖嘛! 亦都話比大家知, 無論在職定係全職媽咪, 都好忙架!

雷曼倒閉, 經濟唔知會點, 因為自掏腰包慶功, 又想平又要靚, 終於揀咗旺角嘅 稻香迎囍大酒樓。 話晒係慶功宴, 梗係唔可以馬乎, 叫咗又平又正, 抵食夾大碟嘅 飛鴿傳聖旨宴 , 個伙記話條東星有手臂咁長, 真係無講大話, 仲有果碟糯米飯都好正!

十個亞媽坐埋一齊有咩傾? 當然係有數之不盡嘅話題啦: 天文地理, 行街 shopping, 生仔坐月, 湊仔讀書, 咩都傾一餐! 傾到淨返我哋一枱, 差D比人趕我哋走 >>>>>

2008年9月15日星期一

16 個月, 長大咗幾多?

16 個月前....睇吓樂樂對香雞脚 ~~




今日16 個月啦, 個大脚八最啱耕田, 哈哈哈!


2008年9月14日星期日

一家大細慶中秋!

中秋節梗係一家團圓, 做節啦!

同爺爺嫲嫲慶祝一日, 同公公婆婆又慶祝一日, 玩吓燈籠, 瑩光棒, 食吓大餐月餅, 一家大細笑哈哈!



2008年9月12日星期五

A very busy Friday!

今日 >>> 好忙!


一早同二少爺返 playgroup, 今日多咗個女同學。一共四個同學一齊上堂。做手功嘅哋方最近變咗身, 好靚啊! 今日做咗中秋節賀咭, 樂樂當然冇聽指示, 老師教海棉印畫, 佢就人手印畫!


中午同班媽咪 friend 食 lunch, 大鄉里出到中環, 揾唔到間餐應喎。Thai Lemongrass 幾好呀, 幾個媽咪, 今次嘅話題係揾幼兒園啦! 好快....大家嘅BB已經15個月!

下午屋企有煤氣定期檢查, 仲約咗整鋁窗嘅公司黎維修。 大家知唔知鋁窗係要定期檢查同維修, 住咗咁耐都冇 check 過! 之前叫咗人黎檢查, 原來隻隻窗都有問題....唔係甩螺絲就係個鉸鬆晒, 仲有D膠邊都開始老化啦, 所以决心整好佢。 因為師傅話唔洗搭棚, 我仲以為好簡單添; 原來係要成隻拆落黎慢慢整, 五個師傅一齊整咗兩粒鐘! 整完之後, 抹咗一粒鐘!!!

2008年9月10日星期三

强人是我~~的樂樂!

同二少去打第四枝肺炎鍵球菌預防疫苗 (最後一枝啦)。

樂樂真係好 "un 皮"....入到醫生房, 係咁搞嘢! 姑娘抱住佢, 比個玩具佢玩吓, 莫講話喊, 直頭打完針都唔知添! 好强!

大家如果想知多D呢隻預防疫苗嘅注射時間表, 可以睇呢到!

2008年9月9日星期二

開學啦!

放完暑假, 終於開學啦!

小如三年班啦, 要開始訓練佢嘅自理能力。 所以今年要佢自己執書包, 我就只會同佢簽手冊同檢查功課。無驚無險, 兩日都冇帶漏嘢喎!

今年要考 TSA = 全港性系統評估, 真係要努力! 媽咪都要努力陪太子女讀書!

2008年9月7日星期日

It is Sunday!

尋日又行雷又大雨, 今朝起身竟然陽光普照!

拿拿聲去咗粉嶺 Beas River 玩。 新會所終於裝修完畢, 好泰國 feel, 幾靚呀!





2008年9月6日星期六

又食 buffet

今日又去咗食自助餐, 同工人姐姐餞行。 近近哋去咗 Royal Plaza, 第一次去呢到食 buffet, 好多選擇呀, 唔知係咪我哋近來小食 buffet, 好大鄉里咁....見到豬脚薑, 北京填鴨, 碗仔翅, 火焰雪山, 棉花糖, 涼粉等等, 好興奮! 仲有竹蔗水, 提子汁任飲添呀!

最正係~~ 埋單用 HSBC 信用咭, 六折 >>> 幾開心呀!

2008年9月5日星期五

回憶....畢業禮

RMIT 同香港嘅學府, 近年合辦咗D課程。今日有成600個畢業生, 比 RMIT HK Alumni 叫咗去 Grand Hyatt 嘅畢業禮幫手~~ 幫手提D畢業生即時登記成為 Alumni 會員。

見到D畢業生, 又收花又公仔, 攬住家人影相, 好開心呀! 唸返起自己畢業嘅情况.....好模糊喎, 直頭唔記得响邊到行禮! 多得 Alumni officer 提起, 原來係學校附近嘅大會堂, 到依家仲係果度喎。

Function 完咗, 校長哋成班招呼我哋幾個義工, 講起學校嘅發展, 改進等等, 驚覺原來我畢咗業咁多年添! 但比起學校嘅120年歷史, 真係小兒科啦!

2008年9月4日星期四

生日的祝福

今年生日, 收到好多祝福! 有舊朋友, 又有新朋友, 遠到美國嘅有, 近到荃灣嘅又有! 有 BK message, facebook message, 有 e-mail, 有 SMS, 仲有電話嘅祝賀.....好感動!

兩個 "陳年"老友尋晚請我食飯 (陳年嘅定義: 相識超過二十年)。 其實大家每次食飯, 講起留學澳洲嘅點滴, 都好開心, 今次仲開心....因為我唔洗夾錢, 仲有禮物收~~ 大家唔好以為呢個只係處女座嘅鑽石鎖匙扣, 佢仲有另一個用途架!



如爸送咗乜????? 一個家啦; 兩個仔女啦; 數張附屬咭啦, 全職媽咪嘅生活啦....仲有鮮花一束(係咁以啦)!



有咩生日願望? 希望唔好一訓醒覺就老花! 哈哈! 其實乜都有囉, 希望嘅係一家大細都龍精虎猛! 所有朋友同佢哋嘅屋企人都龍精虎猛!

P.S. 想唔想知鎖匙扣仲有咩用....係八達通黎架!

2008年9月3日星期三

蜘蛛俠開飯啦

其實每次一話開飯, 唔理係: 你哋開飯定佢開飯, 樂樂都會自動自覺爬上自己張餐椅等食! 今次爸爸終於影到整個過程....

咪眨眼, 樂樂上演一幕~~蜘蛛俠開飯啦!

2008年9月1日星期一

當年....呢度 -- 香港公園

家姐當年留過倩影嘅呢度, 細佬都要影返張相先得! 公園依舊, 但我哋就多咗個樂樂。大家睇吓兩姊弟似唔似樣? 係咪都係似晒我呢~~