為食天王

咩時候同家姐最 friend?




有得食果陣時囉 ~~

好動寳寳

樂樂呢個年幾, 應該開始睇吓書, 認吓字, 學吓講嘢。

但反斗王乜都唔識, 近來興玩 D 乜?? 估吓.....

親親家姐 >> NO NO NO

坐定定睇電視 >> NO NO NO



係...係...係...玩打關斗同跳梳化呀!

嘈爆.....樂口福之夜

BK 班媽咪又約埋行街食飯啦!

先去九龍城D出口店摷平衫, 然之後再去 樂口福 食飯。小如今個星期日考劍橋試, 英文學校幫佢哋今晚加一堂補吓課, 結果搞到我冇得去 shopping @_@

直接去到樂口福, 嚇C...差唔多全都坐晒享到! 我哋以前出黎食飯, 大不了10個8個; 今晚犀利囉 ~~ 全部都到齊廿三個! 咁多女人一齊食飯有幾嘈呢?? 成間舖淨係聽到我哋把聲, 又敬酒又影相! 班 waiter 亞叔都冇我哋乎 (我唸佢哋好耐冇見過咁高興嘅飯局)!

無啦啦...擺咗兩圍添, 飲杯!



招牌拼盤



嘢食都唔錯啦, 大家至在吹吓水, 講吓 BB 嘅發展, 真係好開心架。下次再約聚會, 唔知要擺幾多圍呢?

反斗城又有BB用品展

今日聽朋友講, Toys R Us 又有 春季嬰兒用品巡禮 呀!

好多牌子都有折 ~~ Nuk 75折, Heinz 8折, 思詩樂、Combi、Seba、Pigeon etc. 有9折。除咗好多貨品有特價之外, 仲有D牌子有贈品送添, 優惠期至 March 23, 2009, 快Ｄ去睇吓啦。

Strawberry farm visit

早前有朋友介紹話好好玩 ~~ 好想去, 但一路都有D猶疑! 樂樂都21個月大啦, 仲唔係好聽指示, 非常之我行我素, 所以都唸緊去唔去好....我驚佢搞到D士多啤梨變晒 jam 就麻煩啦。

但見到好多 BB friends 去完, 睇佢哋D相都真係幾吸引。 結果今個星期日終於約埋幾個朋友仔一齊去試吓! 做咗D資料搜集, 士多啤梨嘅成熟期係每年 12月至3月。原來香港都好多士多啤梨園, 最後揀咗呢個: 錦田有機士多啤梨自摘園, 一個非常之好嘅選擇!

點解?

1) 個園都幾近我哋屋企 >> 連埋搵路, 揸車去只係20分鐘, 比起去流浮山, 粉嶺, 大埔等果園集中地近好多!

2) 地方好大 >> 我哋冇試過其它, 但呢度好大 ~~ 有18 萬尺架!

3) 好多其它嘢玩 >> 毗鄰 錦田鄉村俱樂部 (其實個園係响俱樂部裡面), 有兔仔樂園, 養蜂塲, 有機農塲, 仲有幅大草地比小朋友跑吓, 又有跳彈床, 撈金魚, 沙畫等活動, 當然唔少得燒烤塲啦!

4) 乾淨企埋 >> 冇唸過廁所咁乾淨, 仲有水洗手, 洗士多啤梨, 真係好好!

最開心嘅係小如, 摘咗好多士多啤梨同蕃茄, 埋單兩大籃士多啤梨要二百幾蚊呀 ($60 for 1 kg)!

呢個士多啤梨園係有機種植, 品種主要係法國同日本, 呢個時候好多, 好熟同好甜呀!

對於樂樂黎講, 都係玩滑梯加跑草地好玩 D ~!

如果大家覺得呢個園唔就脚, 可以試吓另外兩個朋友介紹嘅士多啤梨園:

綠油油有機田園

阿良有機士多啤梨自摘園

Disney On Ice ~~ Princess wishes

闊別香港五載的「迪士尼冰上世界」歌舞劇又黎表演3日, 約埋一個朋友仔去咗欣賞今朝 11am 果場。今次好認真, 小如着晒公主裙架!

唔好講表演好唔好睇先....停車嘅安排就唔好啦! 未去到博覽館, 已經塞車。原來入停車塲要人手派泊車咭, 仲要工作人員逐個同司機講解預繳收費嘅優惠; 其實眼見好多鬼佬都唔明, 所以條車龍鬼咁長! 好辛苦泊好車, 落車又要排隊預繳, 結果 ~~ 搞掂晒仲要行成條街先去到表演塲館 Arena !

講到表演~~就真係好正! 有7位家傳戶曉的迪士尼公主：小魚仙(The Little Mermaid)、灰姑娘(Cinderella)、美女與野獸(Beauty and The Beast)、花木蘭(Mulan)、阿拉丁(Aladdin)、睡公主(Sleeping Beauty)和白雪公主(Snow White)以美妙的舞姿演繹她們的經典浪漫故事。每個演員D溜冰技巧都好熟練, 臨尾仲有閃閃令南瓜車同煙火效果, 好精彩!

睇吓幾勁 ~~

當然唔少得迪士尼嘅靈魂人物啦!

嬰兒產品展

唔知大家有冇聽聞, 吉之島今日起有 嬰兒產品展 , 20-22/2 三日仲係感謝日(Jcard 有95折)。我就仲未去行, 但見有朋友去過睇, 都話可以行吓, 尤其多啱一歲以下BB嘅用品。

有興趣行街嘅朋友不妨走一轉!

碟都食埋?

小朋友為食...就係人都知, 但樂樂為食到點?

今日比佢見到我食蛋卷, 當然佢要食埋一份。一食完, 見個碟有D蛋卷碎, 差D想連碟都吞埋, 笑得我吖! 其實屋企冇人咁樣食嘢, 唔知佢响邊樹學, 定係呢種係求生技能之一呢?

錫錫細佬

家姐真係好錫細佬, 可能因為相差年紀比較多, 家姐真係出自內心咁錫 ! 但係細佬就好唔仲意比人捉住黎錫 ~~ 所以成日都有呢D "强吻" 嘅鏡頭出現!!!

霧鎖中環

約咗幾個朋友下午茶, 今次選址中環新碼頭 Pier 7 Cafe & Bar. 因為唸住可以比小朋友享受吓陽光, 跑吓吸收吓新鮮空氣~~

但係今日天不造美, 冇太陽不特止仲霧鎖中環.....

其實呢個地方都幾好, 可以睇吓風景; 食物質素? 一般啦, 但好似 starbucks 咁上吓嘅價錢, 又唔洗等位, 都算係咁啦!



有咩玩? 周圍搞嘢周圍跑囉!

Breakfast with the Ponies

一家大細嘅情人節慶祝活動, 就係同馬仔食早餐! 話明食早餐, 天都未光就要出門口 zzzZZZ!



好彩嘅係....小如樂樂都習慣早起身, 六點幾出口門果陣, 佢兩個不知幾生猛。

家姐自己襯咗一套騎師裝, 幾型呀! 去到馬會, 梗係先同馬仔玩吓影吓相先啦。 驚唔驚? 兩個都冇有怕喎~~





適逢係情人節嘅關係, 餐廳好有心思 >> 連牛油麵包都係心形, 冧晒!





一邊食早餐, 仲有馬評人講解吓馬匹試閘嘅知識, 實行一路食一路睇晨操; 席間又有小丑同魔術箱表演助慶, 好好玩。

仲有得親身試玩實習騎師日常訓練用嘅木馬, 一嘗學騎馬嘅樂趣呢。

奶粉....加價呀!

之前已經收到 A+3 會加價嘅消息! 好醒地入咗好多貨 :P

今日終於加咗啦 ~~ 加成 $20 蚊 = 10% 都幾離譜。貴都算啦, 聽朋友講今日去買...買唔到添喎! 走咗幾間先買到幾罐。 依家又話金融海嘯, 點解奶粉呢D必需品可以加價加咁多?

之前有好多 BB friends 都轉食日本奶粉, 牌子多D 揀又平D; 但近來日元又高企, 相對價錢都貴咗, 同埋都好似有限額, 唔可以一次過買好多!

今時今日, 養一個 BB 真係唔容易!

YLE - Flyers

小如一向都有返 Kidsmart 嘅英文班, 學嘅係課程係跟:

YLE = Cambridge Young Learners English Tests

舊年三月考咗 Movers, 有 14 shields (都唔錯架, 因為15 個就係滿分), 考嘅內容分三部份: Reading & Writing, Listening 同 Speaking 。

今年三月又考啦, 今次考 Flyers, 其實都幾深架, 所以呢排都要加緊温習吓!

Modern Jazz Exam

小如跳 Jazz 都有兩年幾啦, 跳成點? 都唔錯啦! 今年要報考 C.S.T.D. 嘅考試, 所以依家要每星期跳兩堂。

C.S.T.D. = the Commonwealth Society of Teachers of Dancing.

佢哋嘅考試係 香港認可 嘅。但一睇可以考嘅 level , 原來依家只係個開始。要考到教師級, 仲有慢慢長路! 慶幸嘅係小如真係鍾意跳, 加上佢有一副瘦蜢蜢嘅跳舞骨架, 做父母嘅只好用心栽培囉!

新春熱鬧團拜

同舊年一樣, 約埋一班 BB 團拜, 今年有少少唔同 ~~ 冇去飲茶食飯, 改咗去一個朋友仔屋企嘅會所玩。聽吓歌仔, 玩吓, 傾吓計, 好熱鬧!



唸返舊年, 大家嘅 BB 都仲係一舊飯! 今年呀, 識講恭喜發財又有, 識聞歌起舞又有, 識娟窿娟罅都有…個個周圍走仲爭嘢玩添呀!

睇吓牛王頭樂樂, 蝦女仔喎, 真係失禮晒!

海嘯價鮑翅餐

之前聽聞名苑有個超抵鮑翅餐 ~~ 每位$198又有翅, 又有鮑魚, 又有燕窩!

終於今日扮富豪, 歎咗一餐! 新春時期貴咗D ($238), 但都非常滿意。地方靚, 招呼好, 又好味, Good Good Good!

睇吓幅牆同盞吊燈先, 以為去咗酒店!

有咩食? 宮廷皇燒翅、玉掌伴古法五頭鮑魚、紐西蘭烤羊鞍/砵酒焗珍寶蠔、美極澳洲大花蝦、金瓜蝦乾泡菜苗, 仲有養顏燕窩蛋白杏仁茶等。6 道菜加埋比起散叫平足一半，絕對是海嘯價。

先黎嘅係足三両的鮑翅，湯底鮮甜, D翅都OK粗架, 小如成碗食晒!

五頭鮑魚味濃郁又腍滑，質感有如乾鮑咁鮮甜, 個侍應仲介紹叫兩個白飯倒落個瓦煲度, 實行鮑魚汁撈飯。

大花蝦非常野味, 肉質彈牙添架!

燕窩蛋白杏仁茶 ~~ 燕窩同香滑的杏仁茶實在絕配, 又香又好味, 一D都唔怕甜! 最衰我勁飽, 唔係食兩碗都得!

唔記得講 >>> 仲有隨餐奉送紅酒/橙汁一杯, 再加兩個鐘頭免費泊車!

幫人賣吓廣告先:

名苑酒家地址﹕荃灣西樓角路1至17號 新領域廣場1樓1號舖
查詢﹕2498 5829

Letterland phonics

樂樂每星期返三日 playgroup, 兩日佢自己返, 唔洗陪; 仲有一日係親子嘅, 等我可以陪吓佢, 知到吓佢嘅進展。

返親子嘅果間 centre, 上堂有用 Letterland phonics。

Letterland 係一套英國嘅圖像拼音系統，將每一個英文字母用圖像拼音人物化，每個字母有其獨特的個性及故事，好似 Annie Apple, Jumping Jim, Talking Tess, Uppy Umbrella etc. 等小朋友可以透過故事內容掌握英文字母的發音, 每個英文字母都有一隻歌配合, 加深拼音學習嘅興趣。我自己冇學過 phonics, 覺得呢個 program 真係唔錯。

其實好似話 Letterland 嘅課程係適合3歲以上嘅小朋友, 因為不單是學習英語拼音，仲可以提高學習英語的興趣，從而提高佢哋閱讀理解, 寫作及串字能力。坊間都有好多 playgroup 用呢套示統, 大家不妨試吓。

開始變得專注

今日返 playgroup, 老師話樂樂開始變得專注!

平時上堂, 樂樂都比較自我, 可以嘅話 (即係老師冇加以阻止) 佢會自得其樂。唯一令佢可以坐定定就係茶點時間。

今日, 老師話佢企上張櫈度, 高咗 ~~ 所以同老師嘅目光近咗, 老師話 "Victor, SIT down please!" 佢望住老師 (好專心嘅眼神), 即刻坐返低。一個少進步, 令到老師好高興!

Yummy seafood!

去朋友屋企拜年, 跟住成班十幾人去西貢食海鮮-->通記海鮮酒家。真係 N 年冇入西貢囉! 今次咁多人, 食咗餐勁豐富嘅海鮮餐!

有咩食?

大龍蝦刺身 (加兩食 ~~ 伊麵同炒什錦)
象拔蚌剌身 (連埋煲粥)
清蒸鮑魚
豉椒炒聖子
椒鹽瀨尿蝦
清蒸石班
燒鵝
鬚炸鮮尤
咕嚕肉
炒飯
兩碟時菜
芒果布甸
合時鮮菓

勁唔勁? 梗係食到有如有剩添啦! 可能朋友識通記, 食物好味, 服務一流, 價錢唔算貴, 仲有間好似房坐, 對於我地又大又細咁多家人, 實在係好正!