天山雪蓮

細個睇武俠片, 話天山雪蓮可起死回生、令人長生不老、最緊要係可以增加功力，而且是百年難得一見，可遇而不可求嘅極品。

點知今日响街市, 菜檔亞姐話介紹D好嘢我嘆吓~~就係天山雪蓮啦!

一唸起長生不老, 即刻想飛撲埋去睇吓! 但再唸吓....可以增加功力, 咁咪大鑊, 樂樂食咗點算? 哈哈, 好彩亞姐比埋張說明書(有時 c9 都好 professional 架)!

原來天山雪蓮 = 天山雪蓮果, 原產地南美洲, 含有20種人體必需的氨基酸和鈣、鎂、鉀、硒等微量元素和豐富的礦物質。雪蓮果外形似番薯，食落口感就似籮白。根據張說明書, 話可以降低血糖同膽固醇, 預防高血壓同糖尿病喎! 仲可以養顏美容, 消脂減肥, 能有效可治喑瘡, 清熱解毒添呀! 咁犀利???

原來仲可以當生果食, 但第一次我都係選擇用黎煲湯!

材料:
天山雪蓮(1條)、粟米(3條)、無花果(6粒)、豬展($20)

煲法:
豬展出水
天山雪蓮去皮切件
粟米切件
水滾後加入所有材料，煲兩個鐘, 搞掂! 超甜嘅湯 is ready!

想唔想試吓? 睇呢到果條片天山雪蓮果鮑螺湯 click 分段重温。

Enjoy enjoy!

又表演高難度動作

星期日朝早, 係爸爸同小如樂樂嘅親子時間, 每一次都有驚喜!

今回係凌空爬車頂 ~~

家姐都唔執輸, 馬騮爬天梯 ~~

兩隻嘢仲一齊玩滑梯 ~~

元旦海鮮大餐

尋日去完遊艇會飲茶, 如爸忽發其想話要食元旦海鮮大餐。帶住樂樂, 又冇工人嘅日子, 出街食飯簡直係等於唔洗食! 一箭雙鵰嘅妙法 ~~ 結果去左咗買海鮮返屋企整!

邊到買? 三聖村果D海鮮檔囉。聽聞三聖海鮮靚過西貢兼老實D (其實係因為近我哋好多)。

元旦大餐
~~~~~~~

蒜蓉粉絲蒸象拔蚌 (6隻, Ｄ粉絲好味到....)
清蒸鮑魚 (6隻都大過樂樂手版)
薑葱蒸東星班 (斤幾重, 長過我隻前臂)
上湯時菜

我覺得最正係鮑魚, 多謝大廚!

Happy New Year ~~ 2009!

新年啦! 元旦日同公公婆婆舅公妗婆一行十幾人去飲茶 ~~ 黃金海岸鄉村俱樂部‧遊艇會 。

唔洗講, 樂樂坐唔夠 10 分鐘就要落地玩! 好彩呢個 club 有 playroom, 不知幾好玩!

呢個微波爐廚房玩具, 玩咗幾鬼耐呀!

大除夕, 好忙!

早上帶咗小如同樂樂去紅棉道觀禮, 樂樂第一次參觀婚禮, 可能有Ｄ緊張, 拖實家姐喎!





其實我都好擔心佢會係婚禮上失禮人....例如人哋準備講 " 我願意", 樂樂大叫 "NO" 咪大鑊, 哈哈! 好彩好彩, 全程好乖, 諸事八卦係度裝人哋, D 賓客拍手, 樂樂又拍手添!

爸爸成日話想帶佢兩個返工司玩, 今日終於實現啦! 去到 IFC, 小如好鐘意Ｄ裝飾, 影咗好多相呀!







跟住.....仲要同人迫去 City Super 買我地嘅除夕大餐!

晚餐就係食小如親手泡製嘅澳洲生菜沙律 (有車厘茄, 粟米, 仲有 Bacon bits, 加埋 Caesar sauce, 好正呀)。至於主菜係如爸整嘅磨菇燒汁澳洲牛扒啦, 都 Very Good!

一家大細嘅除夕晚餐, 唔洗五舊水, 呵呵呵, 祝大家新年快樂!

寶寶成長路

今日去咗健康院聽講座, 聽吓18-24個月BB嘅發展。呢段期間都不外乎係學講嘢, 正面管教, 同介片等等。大家如果想要呢Ｄ小冊子, 可以睇 健康資訊一歲至三歲親職教育。

姑娘仲播咗一個 video, 大家可以用5分鐘睇吓呢條 link, 1-2歲果條片呀!

寶寶成長路 ~~ 本片旨在讓家長了解孩子於零至三歲的體能、手部操作、社交情緒、語言及認知等發展，從而給予孩子適當的培育。

又趕兩塲!

下午又有BB趴地, 係响一個朋友企嘅會所搞, 今次小型D, 30 個 BB 到啦! 好多謝有份搞嘅媽咪, 由訂塲地, 到訂食物, 到交換禮物, 仲有Ｄ媽咪自制愛心甜品, 好唔話得! 點解冇相睇?? 由去到會所開始, 我同如爸就係咁追住樂樂, 邊度有時間影相呀。

跟住就要去飲啦 ~~ 樂樂第一次去飲呀! 銅鑼灣利舞臺 彩福皇宴 好似話新開嘅, 真係幾靚喎! 歐陸式禮堂, 起碼有20呎高, 仲有變色嘅燈光, 加埋一對新人响旋轉形雲石樓梯行落黎，非常之有氣勢!

食物質素都好好呀, D 嘢上枱係熱辣辣架! 搵緊地方擺酒嘅朋友不妨睇睇呀!

It is boxing day!

尋日跑咗兩個 party, 五大袋禮物, 小如一早起身就開工拆啦!

大家先睇吓有幾多......拆到手軟呀!



真係多謝晒各位嘅禮物 :) 希望大家有個美好嘅 2009 年!