Charlie Brown Cafe

今日全家出動參加小妹妹 Momo 嘅一歲生日派對! 壽星女好靚呀, 着晒公主裙, 唔怕醜冇扭計仲任人抱, 真係乖!

去邊度開 party? 唔係麥當當, 唔係老人雞, 又唔係食 pizza 喎! 好新穎嘅地方 ~~ Charlie Brown Cafe 。

環境好好 (有間房仔可以坐廿幾人), 食物好味 (buffet style), 招呼都好呀! 如果人小小嘅聚會, 不失為一個好選擇。

10th Anniversary!

結婚10週年紀念, 原來叫做 Tin wedding 錫婚。面對全球金融海嘯, 唔敢買幾卡鑽戒, 唔敢擺返幾廿圍! 眼見多個國家笠笠亂, 又唔敢去旅行!

點慶祝? 二人世界撑吓枱脚咁囉 ~~

咁靚嘅地方係.....Felix 。呢間餐廳都幾有創意.....個 menu 雖然唔係好多嘢揀, 但我唸廚師真係好用心創作菜式。

食咗 D 乜? 我叫嘅頭盤係 " Duck egg, Uni, Pork belly" ~~ 從來冇唸過呢三樣嘢可以一齊食! 結果係出乎意料哋好食, Yum Yum Yum!



主菜我揀咗 Black Cod 同魚子醬, 都好好, 食嘅時候Ｄ魚係脆嘅!

呢個甜品嘅賣相好靚! 係 Raspberry 下面嘅果凍真係好味!

A problem a month

估唔到一條小學嘅題目, 考起我同如爸!!! 絕對唔係講笑....一個會考 maths 攞 A 嘅如媽, 計咗唔知幾耐先計到; 其實應該話撞到至啱! 不過我唸應該有方法計嘅, 識計嘅高人請指點一吓, 唔該!

唔識嘅大家亦試吓動動腦筋吖~~ 用1-15 (不可重覆使用) 加入圓圈入面, 令到每個菱形嘅四個圓圈數字加埋, 都要 = 30



慢慢玩吓!

Cocktail party

好耐冇去尖東! 原來依家海皮D酒店同商塲整得好靚, 露天茶座同酒吧, 加上聖誕燈飾, 別有一番風味啊!

去咗 Shangri-la 响 Tapas Bar 搞嘅 cocktail party。見返好多舊朋友, 舊客仔, 原來酒店旅遊業既行頭真係好細架!

仲有幸運大抽獎 ~~ 可惜幸運今晚揀唔中我 :P

又去迪士尼!

小如嘅測驗週終於完結啦! 今日放早, 所以如爸都一早攞定假, 又去迪士尼玩吓。 去到仲撞到幾個同學仔, 一齊玩好開心呀！

平日去玩, 人唔算多! 亦無唸住咁快就有聖誕裝飾~~ 好靚, 可惜米奇米妮未換聖誕衫。不過唔緊要啦, 我哋係 annual pass, 遲D又去過囉!









迪士尼真係有佢嘅成功之處>> 我哋嘅 annual pass 就黎到期, 就已收到續期優惠! 15% off 呀, 即係去兩次就抵返晒。結果.....梗係續咗啦, 橫掂樂樂唔洗錢, 我可以成日同佢去嘛!

明報~~幼稚園選校全攻略

早前有朋友介紹網上登記攞 《幼稚園選校全攻略》, 只不過短短幾個鐘就話派晒! 失望之際, 竟然見到屋企樓下大堂有得攞喎 :)

如果你攞唔到, 依家有 電子版本 睇啦!

其實明報網仲有好多好嘢, 得嫻入去睇吓!

熱門幼稚園面試內容

熱門學校派表日期

面試啦喂!

呢排好多媽咪都忙於帶 BB 面試, 今日終於輪到樂樂。點呀, 個面試 look 得唔得呀?

見咗兩間幼兒園: 1) 聖文嘉 同 2) 方方樂趣

1) 聖文嘉係小如嘅母校, 由歲半親子班讀到 K3, 連學校網頁都見到有小如幅相架。

面試型式係由主任同家長傾談, 了解吓小朋友嘅發展, 平日邊個照顧佢等等。其間主任就會觀察吓樂樂玩嘅時候的表現, 仲會同佢玩一陣。老師一睇就知樂樂係好動探索型 ~~ 皆因佢不停搵嘢玩, 一見到新奇嘢就係咁搞。

仲有一幕係樂樂準備爬入個足球龍門入面, 差D成個人倒頭中, 嚇到亞主任以3秒速度嘅幾個箭步衝過去...最搞笑係如爸一路撟住手企响樂樂隔離 ~~ 佢見慣吖嘛!

咁高水準嘅表現, 結果梗係收樂樂啦！

2) 跟住去方方, 呢間唔得多架啦!

首先老師比三個杯 (紅, 黄, 綠), 每個內有三塊同色既形狀。 先問個杯咩色 ~~ 唔識答! 因為樂樂根本唔識講嘢

跟住倒D形狀出黎叫佢放入同顏色嘅杯度 ~~ 唔識! 但樂樂攞起D杯係咁扮飲水 :)好搞笑!

然後叫樂樂, 指媽咪, 指爸爸 ~~ 都唔識!

再比塊有蕃茄, 紅籮白, 薯仔同白菜既版佢砌 ~~ 都唔多識!

比本書佢睇, 佢想冲去玩....

最後 miss 可能驚我地唔開心, 就叫佢爬隧道 ~~ 得呢樣識喳!

其實佢唔收我都唔意外, 小朋友嘅發展人人唔同, 我唔覺佢蠢喎, 只不過佢識嘅唔係呢Ｄ遮, 你唔收佢係你嘅損失囉。

Break 1 break!

考完兩日試, 有星期六、日抖吓先再考兩日! 所以今日帶小如出去玩吓, 食返碗味千拉麵, 可以鬆一鬆, 休息半日唔温書。

去到遊樂場, 最開心....梗係樂樂。今次玩乜??? 模擬吊環練習囉~~

先準備趴上千秋到, 雙手扶實;

然後轉用單手同雙脚離地, 跟住手都放埋 (扮十字懸垂)

表演完自己都拍爛手掌!!!

拆線啦

眨吓眼就一星期, 小如下巴聯果四針, 今日拆線啦!

醫生三兩吓手勢就搞掂, 傷口埋得幾靚呀, 好彩係下巴底下, 唔岳高頭都唔覺。 畢竟已經有兩條疤痕, 希望小如以後真係要小心D囉!

同 BB friends 去旅行

今日同班 BB 朋友仔都旅行, 目的地係 馬灣公園。

上次係 blog 都介紹過, 因為小如暑假去參觀過。我哋連馬灣都未去過....原來咁靚嘅! 雖然好近我哋 (由屋企出發到馬灣公園, 全程只需 40 分鐘), 但都好有旅行 feel !

等小如帶大家參觀吓彩虹牆~~由10位意大利藝術家專程來港，用近一個月時間繪畫而成。彩虹牆表達人世間七種不同層次的愛，畫作以立體創作，每幅顏色畫從左看和從右看的內容不同，構成七幅牆14幅畫的奇妙效果。 好靚架!

仲有好多刻咗字嘅石頭....

由公園入口上到鳥望台, 行咗好多樓梯.....為免阻塞交通, 樂樂當然唔洗行啦! 所以一上到去, 佢就係咁自由行囉!

其實馬灣公園亦是孩子走出課室進行通識教學的理想場地，佢哋有搞設計以大自然為課室、寓學習於遊樂的活動課程比小朋友。

我覺得大個D, 有得3-4歲比較適合, 帶BB黎玩, 你辛苦過佢 !

歲半囉喎!

樂樂今日歲半啦~~有幾大個？身高 86cm (好高); 體重 12.25kg (好瀟灑), 都應該算標準身型。

識D乜？講嘅仲全都係BB話, 但係句子好長, 有晒高低音同表情,只不過係佢明你唔明!

根據 嬰幼兒成長參考資料 , 15-18個月應該識呢D:

由大人牽著手，會自己走下樓梯 ~~ 唔洗人拖都得
會把兩個積木疊高而不倒下來 ~~ 將厠紙疊四舊都得
會說將近10個單字 ~~ 佢所講D單字多數冇意思
會模仿大人做家事，例如掃地、擦桌子 ~~ 最叻响手寫板上畫, 同埋打真嘅 keyboard

都唔錯呀! 仲有最仲意請人食嘢, 真係乖!





仲有拿手扮蜘蛛俠, 爬高爬低:

小朋友嘅發展真係各有不同, 都係果句~~最緊要健康就得啦!

明日之星

為人父母, 有冇唸過Ｄ仔女大個會成為天皇巨星? 過紅隧會見到佢張大海報? IFC 外牆有佢張相? 好似咁呢:














又或者出唱片呢, 又或者.....

入黎呢到 發吓夢先啦~~

啱啱攞咗冠軍....就跌親

啱啱禮拜日先攞左两個第一，一個第二，點都估唔到今日小如溜冰會跌親個下巴！

今日係去學溜冰, 因為聽日運動會，唔洗交功課，所以早Ｄ去玩吓。真係睇唔到佢點跌.....淨係見佢係溜冰塲出黎，坐底摸吓下巴，我仲問係佢點解隻手好似瘀左, 佢先知係血漬。一睇個傷口原來都幾大呀, 見到自己流血小如先開始喊！

溜冰塲Ｄ人好好, 好快埋黎幫手, 一知到流好多血仲話都冇咁快叫十字車。結果冇用到呀，取消左，梗係唔去政府醫院啦.....去返港安~~有感情呀，佢五歲跌親下巴果次都係响港安聯左五針。

今次去到又係上次個醫生當值，不過今次冇緣呀, 因為佢啱啱整爛左副眼鏡喎 (咁啱....怕左小如就真啦!)

最後搵左第二個醫生聯左四針遮, 同上次果條疤痕變左個 "＝" 號囉! 大家請留意：整個聯針過程係冇喊嘅....小如你真係好強!

Penguin Play

同樂樂又去試堂....今次有Ｄ唔同, weekday 班都要 waiting list 成两個月, 咁巴閉, 梗要試吓！

Kidz-n-us 的 Penguin Play 話係 >>> 「為小朋友提供一個早期智能啟發的環境, 讓他們藉著不同的活動，例如語言學習，數學認知，百科知識介紹，體能訓練，音樂欣賞，集中力及記憶力訓練等，讓家長能與孩子建立密切的親子關係，並提升幼兒的智慧及刺激其腦部發育，為他們日後的學習作好準備。」

係咪真係咁? 其實真係幾好喎 ~~ 課程內容充實, 外藉老師誇誇地張果D呢 (呢D style 小朋友仲意架), 環境乾淨, 招呼又好, 連幫手派茶點嘅亞姐都好細心!

試堂洗唔洗錢? 預先要比 $200, 但如果試完堂報名就送返一堂, 我覺得好公道喎! 值得推介。

參賽嘅戰績

今日三個比賽項目, 第一個係响太古城10:30am。比賽前例牌要影張相先~~



Freestyle 1 >> 攞第二 (呢個小組有四個參賽者)! 第一次落場比賽, 難免有失手嘅 :( 得第二己經交到功課啦!



Solo Compulsories FS1 >> 攞第一 (呢個小組都係四個參賽者)! 有早上嘅經驗, 今次定好多, 做飛機脚果陣, 現塲仲有人拍掌呀!





到最後一個 Jump & Spin (雙人項目) >> 越戰越勇, 都係攞第一....Well done!

溜冰比賽現塲

今年 ISI Skate Hong Kong, 有過千人參賽! 跟據參賽者年齡, 性別, 資歴等等再編排小組比賽, 每組大約有4-5位參賽者。

小如參加三項比賽 (對於唔太熟識溜冰嘅大家, 包括我呀, 我加插左 offical 嘅解析比各位參考吓):

一早响太古城嘅 Freestyle 1 ~~ A programme routine emphasises on the required test level manoeuvres from the skater's current freestyle test level.

下晝响又一城嘅 Solo Compulsories ~~ The skater will perform the required manoeuvres from the following list according to their Freestyle test level in any order. They have only one attempt at each manoeuvre. There is a 1 minute time limit for all levels.

FS1: Forward Inside Pivot / Forward Arabesque / Waltz Jump

最後係夜晚响又一城嘅 Jump & Spin ~~ Two skaters enter the ice as a team. The first skater performs his/her choice of a required jump twice, followed by the second skater performing his/her choice of a required spin twice.

重返勞動市場??

自從做咗全職媽咪, 真係好多時間可以照顧如如同樂樂。隨住樂樂一日一日咁長大, 距離返幼兒園嘅時間一日一日咁接近, 所以舊年開始搵D野做吓。

做酒店嘅年代認識 HelmsBriscoe -- 美國好大好出名嘅 site selection 公司, 惜日嘅客仔, 估唔到今日請左我喎。 其實只不過 home office, part-time 性質咁做吓, 足不出戶都可以令到自己知一Ｄ市場嘅動向, 久不久去吓 seminar, 見吓d 酒店朋友, 有百利而無一害。

今日去左 Best Practice Awards 一年一度嘅頒獎禮, 同佢地個 founder 識左好多年, 今次仲安排張枱可以比我介紹吓公司。係美國出名, 但香港就唔係咁多人識啦, 始終各個城市都有其不同嘅商業模式。不過今日都有收穫喎, 遇到幾個客呀！慢慢煲吓生意, 睇吓煮唔煮得成熟飯。

I go to school....by myself....

懷住戰戰兢兢嘅心情, 樂樂今日第一次自己返學 (係唔洗媽咪陪上堂果種 playgroup)。著起校服, 揹返個書包, 似模似樣架, 仲拿拿聲去攞鞋同開門。

去到新學校, 一D都冇有怕! 老師出黎接佢地, D 小朋友都好乖, 拖住老師....樂樂梗係唔比佢拖啦, 自己行, 唔知點解好似識路咁! 沖到入課室, 周圍搵玩具玩; 鬼婆老師就有呢度好, 冇鬧不特止, 仲話 "that's Ok!" 見佢無懼陌生環境, 我梗係走啦 >>> 呢個班係要佢地學獨立嘛！

我一行出門口, 有個 BB 女就開始喊 (佢都係第一堂), 結果叫左家長入去陪。我都驚樂樂喊, 裝吓佢又Ok喎!

第一堂, 咁順利? 梗係唔係啦! 大半個鐘之後, 老師都係搞佢唔掂, 話樂樂一知到對門開得, 就成日想去開門; 當然就仲有行黎行去, 琴高爬低等等! 結果叫左工人姐姐入去陪佢 (捉住佢就真)。

老師既評語係: 非常活躍, 專注力比較低, 坐唔定 (冇錯呵, 呢個係佢呀), 但第一堂遮, 需要D 時間, 慢慢就習慣架啦!

樂樂病了

星期六樂樂開始有鼻水, 即刻第一時間睇醫生! 病既定律, 流完鼻水跟住就實係咳, 好怕 BB 咳, 因為有咳就多數嘔奶, 一嘔奶就實瘦晒....

但今次出奇地快好返, 冇嘔奶, 今日只係小小咳, 冇咩鼻水添, 算好得快啦!

參賽嘅戰衣

小如舊年暑假開始學溜冰, 一年有多啦! 好意外教練話佢可以參賽喎 :) 因為我見有Ｄ參賽者真係好勁吓!

Skate Hong Kong 今年係 Nov 8-9 於太古城同又一城溜冰場舉行。小如參加咗三個項目: Freestyle 1, Solo Comp. FS1, Jump & Spin Medium。練習咗一個月, 表現一般啦! 畢竟佢嘅冰上經驗都尚淺。但其實參加比賽, 都係想有個機會參與, 比佢有個回憶!

參賽嘅戰衣, 班咗三件返黎! 呢兩件係單人比賽, 靚唔靚?



呢件野人look 係用黎雙人比賽架, 同個朋友仔一樣嘅, 我唸兩個一齊著果陣一定好搞笑~~