又要面試

今日又要面試 ~~ 綠楊幼兒園。到目前為止, 有三間學校收咗樂樂出年讀 N1, 但我最想佢讀嘅係呢間! 點解? 因為方便囉, 同埋聽講都係好學校黎架, 如果唔好, 上次交報名表就唔洗排两個鐘啦!

今次面試 look, 主打都係要斯文, 希望可以令老師嘅印象加小小分。

爸爸都要練定四萬笑容, 務求要父子同心, 其利斷金。

早咗15分鐘去到學校, 先熟習環境。樂樂一見到個滑梯, 即刻大顯身手......由地下上滑梯, 要爬過一個斜嘅繩網; 當其它小朋友要家人扶住上滑梯, 樂樂梗係自動波唔洗人扶爬上去啦!

面試嘅安排幾好, 5-6個小朋友一組, 入到一個遊戲間, 有本地同外籍老師, 仲有個主任攞住個 file, 應該係負責比分呱。個遊戲間有唔同嘅玩具比小朋友玩, 氣紛好好, 輕輕鬆鬆。跟住每位老師就同一位小朋友玩, 從而觀察小朋友嘅表現。

樂樂表現點? 總括黎講係.....牛頭唔搭馬嘴囉!

老師同佢玩廚房仔 >> 佢就整跌晒Ｄ沙煲瓦罉;

老師叫佢疊大積木 >> 佢彩你都傻;

老師叫佢爬過個小拱門 >> 佢繞個圈行外面;

唯一 OK 係老師同佢玩電話, 佢識扮聽電話囉!

其如時間就四圍走, 可憐嘅老師~~同佢面完試索晒氣, 流晒汗!

雖然咁嘅表現唔見得好好, 但起碼全程都係樂樂自己同老師玩, 唔洗我哋陪佢, 充分表現佢可以獨立嘅一面。坐我哋隔離嘅果對父母, 基本上係老師叫個小朋友做咩, 父母就再叫一次, 跟住一齊做。你係老師, 你收邊個?