狂風暴雨中遊挪亞方舟

早有所聞馬灣嘅新景點 挪亞方舟 即張開幕。雖然未公佈正式開放日期, 各項設施就接受團體參觀, 但又要申請又要安排又要約一大班人, 都唸住唔去住架啦!

點知近來有個朋友入咗去裡面做, 今日可以做先頭部隊去玩吓.....滿懷興奮嘅心情却撞啱狂風暴雨(好彩最後決定冇帶樂樂一齊黎)!! 由珀麗灣碼頭, 幾經辛苦全身濕透先去到 :(

室外景點全部都冇得玩啦!

只參觀咗 珍愛地球館 同 方舟生命教育館, 好啱小如玩, 好有教育意義! 珍愛地球館嘅15個主題展館, 糅合了生命教育、多元智能發展和通識教育元素, 透過互動遊戲, 引發兒童的思維和創意, 在愉快的環境中學習。每參觀完一個館, 答中問題仲可以有一個印仔, 集齊咁多印仲有禮物換添!